Avropa miqyasında təsirli olan və "isti qübbəsi" adlandırılan yüksək təzyiq sistemi qitə daxilində hava temperaturunu mövsüm normasından 15 dərəcə yuxarı qaldıraraq tarixi rekordların qırılmasına səbəb olub.
AFN.az xəbər verir ki, Fransada bu anomal hava şəraiti artıq yeddi nəfərin ölümünə səbəb olub.
Avropa may ayında analoqu olmayan bürkü dalğasının təsiri altına düşüb, durgun yüksək təzyiq sahəsi bir çox ölkədə temperaturu kəskin artırıb.
İngiltərənin paytaxtı Londondakı "Kew Gardens"da termometrlər 35,1 dərəcəni göstərərək ölkə tarixinin ən isti may gününü qeydə alıb.
Bu göstərici bir gün əvvəl elə Londonda qırılan 34,8 dərəcəlik rekordu da geridə qoyub.
İngiltərədə bundan əvvəlki ən yüksək may ayı temperaturu 1922 və 1944-cü illərdə 32,8 dərəcə olaraq ölçülmüşdü.
Oxşar şəkildə İrlandiyada da temperaturlar 28,8 dərəcəyə çataraq ölkənin may ayı rekordunu təzələyib.
Tarixi isti dalğası təkcə gündüzlər deyil, gecələr də təsirini davam etdirir.
İngiltərənin cənub-qərbindəki Kambornda gecə temperaturunun 21,4 dərəcədən aşağı düşməməsi ilə temperaturun 20 dərəcədən yuxarı qaldığı tropik gecələrdən biri daha yaşanıb.
İsti hava dalğasının qovurduğu digər bir ölkə olan Fransada isə termometrlər 36 dərəcəni göstərərək tarixinin ən isti may günlərini yaşadıb.
Fransa hökumət rəsmiləri bu qəfil və ekstremal istilər səbəbindən birbaşa və ya dolayısı ilə yeddi nəfərin həyatını itirdiyini açıqlayıb.
Meteoroloqlar temperaturların bir müddət də mövsüm normalarından 5-10 dərəcə yüksək qalacağını, lakin növbəti həftədən etibarən tədricən azalacağını proqnozlaşdırırlar.
Avropa anomal istilərlə qovrularkən, dünyanın digər tərəfində, Cənub yarımkürəsində yerləşən Avstraliya isə şiddətli yağışlı hava şəraiti ilə mübarizə aparır.
Ölkənin cənub-şərq və şərq bölgələrində təsirli olan güclü fırtına və göy gurultulu leysan yağışları səbəbindən meteorologiya qurumları həyəcan təbili çalıb.
Kvinslend ştatında cəmi yarım saat ərzində hər kvadratmetrə 50 millimetr yağış düşdüyü halda, Yeni Cənubi Uels ştatında küləyin sürəti saatda 104 kilometrə çatıb.
Rəsmilər dağıdıcı küləklər, dolu və qəfil selə qarşı əhalini xəbərdar edərək, bəzi bölgələrdə yağışın miqdarının lokal olaraq 100 millimetrə yaxınlaşa biləcəyini bildirirlər.
