ABŞ Konstitusiyası müharibə elan etmək səlahiyyətini yalnız Konqresə verir.
KONKRET.az Musavat.com-a istinadən xəbər verir ki, bu səbəbdən İrana qarşı hər hansı hərbi əməliyyatın hüquqi əsasla həyata keçirilməsi üçün ya müharibə elan edilməli, ya da hərbi gücdən istifadə üçün xüsusi icazə verilməlidir.
Bu arada Demokrat senator Konqresə qanun layihəsi təqdim edib. Layihə Donald Trampın Konqresin razılığı olmadan İrana qarşı hərbi gücdən istifadə etməsinin qarşısını almağı hədəfləyir.
Konstitusiyanın 2-ci maddəsi isə ABŞ prezidentini Silahlı Qüvvələrin baş komandanı elan edir və təcili müdafiə vəziyyətlərində məhdud hərbi gücdən istifadə etməyə səlahiyyət verir. Bu ziddiyyətli vəziyyət uzun illərdir ABŞ siyasətində konstitusional mübahisə mövzusudur.
2024-cü ildə Prezident Co Baydenin Yəməndə həyata keçirdiyi hava zərbələri də oxşar narazılıqlara səbəb olmuşdu. Bəzi konqresmenlər onun Konstitusiyanı pozduğunu iddia etsə də, hüquqşünaslar məhdud xarici hərbi əməliyyatların prezidentin səlahiyyəti çərçivəsində olduğunu bildirmişdilər.
Hazırda Trampın ehtimal olunan hərbi addımlarının qarşısını almaq üçün hüquqi mexanizmlər işə salınır və Senat bu məsələni tezliklə müzakirəyə çıxarmaq məcburiyyətində qalacaq.
