İsrail və Fələstin HƏMAS hərəkatının nümayəndələri Qəzza zolağında münaqişənin həlli üçün Qətərin vasitəçiliyi ilə yaxın günlərdə dolayı danışıqlar aparmağı planlaşdırır. Bu barədə Qətər hökumətinin başçısı və xarici işlər naziri Şeyx Məhəmməd bin Əbdül Rəhman Əl Tani məlumat verib.
"Qətər bir neçə gün ərzində İsrail və HƏMAS hərəkatının nümayəndələri arasında Qəzzada atəşkəslə bağlı dolayı danışıqların bərpa olunacağını gözləyir. Bölgədəki son hadisələri nəzərə alaraq, İsrailin Qəzzaya zərbələri gücləndirmək üçün İranla atəşkəsdən istifadə etməyəcəyini gözləyirik", - baş nazir Dohada keçirdiyi mətbuat konfransında bildirib.
O, həmçinin qeyd edib ki, Qətər və Misir Fələstin anklavında münaqişənin həllinə yönəlmiş vasitəçilik səylərini davam etdirir. Eyni zamanda, Qətər hökumətinin başçısının sözlərinə görə, “İsrailin İrana qarşı son təcavüzü Qəzza zolağında atəşkəsə nail olmaq səylərini puça çıxarıb”.
Martın 18-də İsrail ordusu bu ilin yanvarında yaradılmış atəşkəsi pozaraq Qəzza zolağında döyüşləri bərpa edib. Qətər, Misir və ABŞ-ın vasitəçiliyi ilə bir neçə raund danışıqlardan sonra münaqişə tərəfləri yeni atəşkəsin şərtləri ilə bağlı razılığa gələ bilməyiblər.
Əziz Mustafa
