Rusiyanın stolüstü tennis və atıcılıq idman növləri üzrə komandası III MDB Oyunlarında iştirak etmək üçün Gəncəyə gəlib.
AZƏRTAC-ın bölgə müxbiri xəbər verir ki, idmançıları Gəncə Beynəlxalq Aeroportunda III MDB Oyunlarının Təşkilat Komitəsinin nümayəndələri qarşılayıblar.
Stolüstü tennis üzrə Rusiya qadın komandasının məşqçisi Sergey Brusin jurnalistlərə açıqlamasında deyib: “Biz Moskva ətrafında, Bronnitsada məşq etmişik. Qonaqpərvər Azərbaycan torpağına gələcəyimizi səbirsizliklə gözləyirdik. Hamımız hazırıq. Yaxşı oynamağa, səviyyəli çıxış etməyə səy göstərəcəyik. Səfərlərimiz elə də tez-tez olmur. Ona görə də buraya məmnunluqla gəldik və əlimizdən gələn hər şeyi edəcəyik”.
Sonra idmançılar yarışların keçiriləcəyi şəhərlərə yola düşüblər.
Xatırladaq ki, III MDB Oyunları 28 sentyabr – 8 oktyabr tarixlərində Azərbaycanın yeddi şəhərində – Gəncə, Yevlax, Mingəçevir, Qəbələ, Şəki, Göygöl və Xankəndidə keçiriləcək. Açılış və bağlanış mərasimləri Gəncə şəhər stadionunda olacaq.
