Tarixi görüşlə bağlı İLK SİQNALLAR – Zelenski Moskvaya gedəcək? – EKSKLÜZİV

Ukrayna xarici işlər naziri Andrey Sibiqa Prezident Volodimir Zelenskinin Rusiya Prezidenti Vladimir Putinlə şəxsi görüşə hazır olduğunu bildirib.

Onun sözlərinə görə, sülh danışıqları çərçivəsində ərazilər və Zaporojye Atom Elektrik Stansiyası (AES) məsələlərinin həlli müzakirə oluna bilər.

A.Sibiqa bildirib ki, sülh prosesi çərçivəsində hələ də iki ən həssas məsələ razılaşdırılmayıb: ərazilərə və Zaporojye Atom Elektrik Stansiyası üzərində nəzarət.

Mövzu ilə bağlı Bizim.Media-nın suallarını Rusiya Strateji araşdırmalar mərkəzinin müdir müavini Daria Qrevtsova bildirib ki, hazırkı vəziyyətdə Rusiya lideri Ukrayna Prezidenti ilə görüşməyəcək:

“Mənim fikrimcə, hazırda Putin və Zelenski arasında görüşün baş tutması mümkün deyil. Bunun əsas səbəbi Putinin açıq şəkildə bildirməsidir ki, görüş yalnız konkret razılaşmalar olduqda keçirilə bilər. Yəni diplomatik kanallar vasitəsilə bütün məsələlər həll edilibsə və yalnız prezidentlərin imzaları qalırsa, o zaman görüş həmin sənədlərin imzalanması üçün mənalı olar.

Sadəcə olaraq, hazırda Putin görüşmək istəməz, çünki anlayır ki, Zelenski bu görüşdə şou və ya qalmaqal yaratmaq, Putini danışıqlar aparmağa qadir olmayan kimi göstərmək istəyə bilər. Bunu isə Trampa göstərmək və onun Putinə qarşı əsəbiləşməsini təmin etmək üçün edə bilər”.

Analitik qeyd edib ki, Rusiya Ukrayna tərəfi ilə danışıqlarına sadiqdir:

“Putin açıq şəkildə onu Moskva görüşünə dəvət edir. Putin uzun müddətdir bu imkanın olduğunu və danışıqlara qarşı olmadığını bildirir. Zelenski əgər Moskvaya səfər etsə, bu, bir tərəfdən Rusiya ilə Ukrayna arasında real hərbi qarşıdurmanın olmadığını, əksinə, Rusiya və Qərb arasında Ukraynanın iştirakı ilə gedən “proxy” müharibənin mövcud olduğunu göstərəcək. Səfər zamanı Zelenskinin tam təhlükəsizliyi təmin olunacaq ki, bu da bir daha onu göstərir ki, hazırda birbaşa Rusiya-Ukrayna müharibəsi yoxdur”.

Daria Qrevtsova əlavə edib ki, Ukraynanın Rusiya ilə danışıqlarına birbaşa Avropa İttifaqı əngəl olur:

“Düzdür, Zelenski Moskvaya getməyə razı olsa da, onu bu addımdan Avropa ölkələri çəkindirir. Çünki Zelenski başa düşür ki, belə bir addım sülh və diplomatik həll yoluna start verə bilər, hərbi arenadakı rəqabətdən daha səmərəli olar.

Bu isə Avropa ölkələrini qane etmir, çünki onların əsas məqsədi münaqişəni davam etdirmək, daha çox güc və resursları bu savaşda cəlb etmək və nəticədə Rusiyanı zəiflədərək iqtisadi və siyasi təzyiq altında qoymaqdır. Ona görə də, Qərb hazırda Putin və Zelenski arasında birbaşa danışıqların baş tutmasını istəmir və bu səbəbdən Zelenski də belə bir addımı atmayacaq”.

Tehran Orucoğlu, Bizim.Media