ain.az, Baku.ws portalına istinadən məlumatı açıqlayır.
Bakının mərkəzində yerləşən Nizami Kino Mərkəzinin divarına qraffiti çəkilməsi təkcə bir "rəsm" məsələsi deyil. Bu, paytaxtın mədəni simasına yönəlmiş açıq vandallıq aktı kimi qiymətləndirilməlidir.
BAKU.WS-in məlumatına görə, şəhərin ən tanınmış və tarixi əhəmiyyətə malik məkanlarından birinə qarşı belə münasibət cəmiyyətin diqqətindən kənarda qalmamalıdır.
Vandallıq, yoxsa "yaradıcılıq"?
Baş vermiş hadisəni sadəcə gənclərin "özünüifadəsi" kimi təqdim etmək doğru deyil. Tarixi və ictimai əhəmiyyət daşıyan binaların divarlarına icazəsiz müdaxilə dünya praktikasında da vandalizm sayılır. Bu, nə incəsənətdir, nə də yaradıcılıq. Bu, şəhərin estetik görünüşünü korlayan, ictimai mülkiyyətə ziyan vuran hərəkətdir.
Qərbdən gələn "mədəniyyət"in kölgə tərəfi
Qraffiti bəzi ABŞ və Avropa şəhərlərində geniş yayılıb. Lakin bu, hər zaman müsbət qarşılanmır. Əksinə, bir çox böyük şəhərlərdə binaların divarlarının yazılar və şəkillərlə korlanması ciddi problemə çevrilib. Tarixi tikililər, metro stansiyaları, körpülər və yaşayış binaları nəzarətsiz qraffiti nəticəsində eybəcər hala düşür. Bu səbəbdən həmin ölkələrdə belə hallarla mübarizə üçün ciddi cərimələr və qanunlar tətbiq olunur.
Qraffiti "mədəniyyəti" Azərbaycanın, xüsusilə də Bakının dəyərlərinə uyğun deyil. Bakı öz təmizliyi, nizam-intizamı və memarlıq harmoniyası ilə seçilən şəhərdir. Bu şəhər xaotik yazılarla deyil, öz tarixi irsi, müasir inkişafı və estetik görünüşü ilə tanınır.
Bakının gözəlliyi – milli sərvətdir
Bakı uzun illərdir ki, həm turistlər, həm də beynəlxalq qurumlar tərəfindən təmiz və gözəl paytaxt kimi qiymətləndirilir. Şəhərin mərkəzində yerləşən tarixi binaların divarlarını mənasız yazılarla örtmək bu imicə ciddi zərbə vurur. Bu, təkcə bir divarın çirkləndirilməsi deyil - bu, Bakının vizual kimliyinə qarşı hörmətsizlikdir.
Son illərdə paytaxtda aparılan genişmiqyaslı abadlıq və bərpa işləri nəticəsində Bakı yeni sima qazanıb. Küçələr, parklar, tarixi binalar bərpa olunub, şəhər demək olar ki, yenidən qurulub. Belə bir şəraitdə qraffiti halları dövlətin və vətəndaşların sərf etdiyi vəsaitə, çəkilən zəhmətə açıq hörmətsizlikdir.
Gənclər və məsuliyyət məsələsi
Bu əməli törədən şəxslərin gənc olması məsuliyyəti azaltmır, əksinə, daha ciddi suallar yaradır. Müasir dövrdə gənclər üçün yaradıcılıq imkanları kifayət qədər genişdir - rəqəmsal platformalar, sərgi məkanları, incəsənət layihələri və s. mövcuddur. Lakin başqasının mülkiyyətinə zərər vurmaq yaradıcılıq deyil, dağıdıcılıqdır. Bu, həm də tərbiyə və sosial məsuliyyət məsələsidir.
Valideynlər övladlarının davranışlarına daha diqqətli yanaşmalıdırlar. Uşaqlara və yeniyetmələrə kiçik yaşlardan ictimai mülkiyyətə hörmət, vətənpərvərlik, estetik zövq və məsuliyyət hissi aşılanmalıdır. Küçədə baş verən hərəkətlər də ailədə verilən tərbiyənin birbaşa göstəricisidir.
Ən son yeniliklər və məlumatlar üçün ain.az saytını izləyin, biz hadisənin gedişatını izləyirik və ən aktual məlumatları təqdim edirik.
