ABŞ prezidenti Donald Tramp İranda ABŞ-ın apardığı müharibəyə dəstək vermədiklərinə görə Almaniyadan əlavə olaraq İtaliya və İspaniyadan da Amerika hərbi kontingentinin çıxarılmasını nəzərdən keçirir...
Poliqon xəbər verir ki, bu barədə o, Ağ Evdə jurnalistlərlə söhbət zamanı bildirib.
Jurnalistin İtaliya və İspaniyadan qoşunların çıxarılması ehtimalı ilə bağlı sualına Tramp belə cavab verib: "Mümkündür… Niyə də yox? İtaliya bizə heç bir kömək etmədi, İspaniya isə çox pis davrandı – tamamilə pis".
Onun sözlərinə görə, Avropada ABŞ hərbi mövcudluğunun azaldılması barədə qərar yaxın vaxtlarda qəbul oluna bilər.
Daha əvvəl Tramp Almaniyada yerləşən ABŞ qoşunlarının sayının yenidən nəzərdən keçirildiyini və mümkün ixtisarın gündəmdə olduğunu bildirmişdi. ABŞ Müdafiə Nazirliyinin məlumatına görə, 2025-ci ilin dekabrına olan vəziyyətə əsasən, Avropadakı ABŞ hərbi bazalarında təxminən 68 min hərbçi xidmət edir. Onların yarıdan çoxu – təxminən 36 400 nəfər – Almaniyada yerləşdirilib.
Həftənin əvvəlində Almaniya kansleri Fridrix Merz bildirib ki, ABŞ nümayəndələri İranla danışıqlarda çətin vəziyyətlə üzləşirlər və prosesin nəticəsi görünmür. Tramp isə buna cavab olaraq Merzi tənqid edib və onun "nə danışdığını bilmədiyini" deyib. O, Almaniya kanslerinə daha çox Rusiya–Ukrayna müharibəsinə diqqət yetirməyi tövsiyə edib.
Bundan əlavə, media məlumatlarına görə, Pentaqonda NATO daxilində ABŞ əməliyyatlarına kifayət qədər dəstək verməyən müttəfiqlərə qarşı mümkün tədbirlər müzakirə olunur. Bu variantlar arasında İspaniyanın alyansdan uzaqlaşdırılması və Böyük Britaniyanın Folklend adalarına dair mövqeyinə yenidən baxılması da var.
Poliqon.info
