BAKI, TurkicWorld
Türkdilli Dövlətlərin bank sektoru regional əməkdaşlığı genişləndirir.
TurkicWorld xəbər verir ki, Qırğızıstanın paytaxtı Bişkekdə Türkdilli Dövlətlərin Bank Assosiasiyaları Şurasının (TDBBK) beşinci iclası keçirilib.
Toplantıya Azərbaycan Banklar Assosiasiyasının sədri və TDBBK-nin sədr müavini Zakir Nuriyev sədrlik edib.
30 may 2025-ci il tarixində keçirilən iclasda Azərbaycan, Qazaxıstan, Qırğızıstan, Özbəkistan, Türkiyə, Macarıstan və Şimali Kipr Türk Respublikasından nümayəndələr iştirak ediblər. Toplantıda qeyd olunub ki, TDBBK 2022-ci ildə Azərbaycan, Qazaxıstan, Qırğızıstan, Özbəkistan və Türkiyə tərəfindən təsis edilib. Macarıstan və Şimali Kipr müşahidəçi üzv kimi Şuraya töhfə verirlər.
Zakir Nuriyev açılış nitqində türkdilli ölkələrin bank sektoru arasında əməkdaşlığın genişləndiyini vurğulayıb. “Şuramızın yaradılması ilə başladığımız işlərin yaxın gələcəkdə türk coğrafiyasında müsbət irəliləyişlərə səbəb olduğunu görməkdən məmnunuq. Bankların birgə layihələrə imza atması və qarşılıqlı əlaqələrin güclənməsi bizi daha yüksək hədəflərə çatmaq üçün ruhlandırır.” - deyə o bildirib.
İclas zamanı regionda bank sektorunda keçirilən təlimlər, maliyyə savadlılığının artırılması üzrə layihələr və iş adamlarının bank xidmətlərinə dair gözləntiləri müzakirə olunub. Üzv ölkələrin nümayəndələri öz ölkələrinin maliyyə və bank sektoru üzrə təhlillərini təqdim edib və gələcək əməkdaşlıq imkanları barədə fikir mübadiləsi aparıblar.
Qeyd edək ki, Türkdilli Dövlətlərin Bank Assosiasiyaları Şurasının növbəti – altıncı iclasının Qazaxıstanda keçirilməsi qərara alınıb.
