Finss.az - Çin avtomobil nəhəngi BYD, yolsuzluq avtomobilləri seqmentində Haval H9 modelinə rəqib gətirməyə hazırlaşır.
Şirkətin törəmə brendi olan FangChengBao (FCB), Ti7 adı ilə təqdim ediləcək yeni modelinin ilk rəsmi “casus” görüntülərini yayımlayıb.
Kamuflyajla örtülmüş prototip hələlik dizayn detalları barədə tam təsəvvür yaratmasa da, ümumi forması artıq diqqət çəkir. İkinci nəsil Haval H9 ilə oxşarlıq xüsusilə kuzov xətləri, şüşələrin yerləşimi və yan güzgülərin quruluşunda özünü göstərir. Lakin Ti7 yalnız zahiri görünüşdə Haval H9-a bənzəyir — texniki baxımdan bu modellər arasında ciddi fərqlər var.
İnsayder məlumatlarına əsasən, FCB Ti7 modeli müstəqil arxa asqıya, eninə yerləşdirilən daxili yanma mühərrikinə (generator funksiyalı) və əsas hərəkətverici elektrik motorlarına malik hibrid güc aqreqatı ilə təchiz ediləcək. Bu isə Great Wall şirkətinin istifadə etdiyi ənənəvi konstruksiyalardan tamamilə fərqlənir.
Yeni modelin damında yerləşdirilmiş lidar sensoru da diqqətdən yayınmayıb. Qeyd edək ki, bu texnologiya son dövrlərdə BYD-nin demək olar ki, bütün modellərində istifadə olunur və avtomobilin yarıavtonom idarəetmə qabiliyyətlərini artırır.
Salon görüntüləri də sosial mediada yayılıb. Beş nəfərlik oturacaq yerləşimi, geniş baqaj hissəsi və BYD-yə məxsus minimalistik interyer dizaynı nəzərə çarpır. Ön paneldə böyük sensor ekran, fiziki düymələrlə təchiz olunmuş çoxfunksiyalı sükan və kiçik rəqəmsal cihaz paneli yer alır.
Hazırda avtomobilin texniki göstəriciləri və ölçüləri ilə bağlı rəsmi məlumat verilməyib. Lakin insayderlər FCB Ti7 modelinin BYD-nin çərçivəli platformasına — DM-O bazasına əsaslanacağını ehtimal edirlər. Bu platforma hal-hazırda Shark pikapı və digər iri FCB modellərində də istifadə olunur.
Qiymətlə bağlı konkret rəqəmlər açıqlanmasa da, mövcud modellərə əsaslanaraq Ti7-nin bazar qiymətinin təxminən 300 min yuan (təqribən 42 min ABŞ dolları) olacağı gözlənilir. Müqayisə üçün, Leopard 5 modeli 240-330 min yuan, Leopard 8 isə 380-424 min yuan aralığında təklif olunur.
Yeni Leopard 7 modelinin 2025-ci ilin sonuna kimi rəsmi təqdimatı və satışa çıxarılması gözlənilir.
