Musavat.com xəbər verir ki, İranın ali rəhbəri Ayətullah Əli Xameneiyə yaxınlığı ilə tanınan yüksək vəzifəli dövlət rəsmisi İran dövlət televiziyasına verdiyi açıqlamada İsraillə mövcud qarşıdurmanın yaxın günlərdə daha da dərinləşəcəyini bəyan edib.
Rəsminin sözlərinə görə, İran–İsrail qarşıdurması ən azı bir neçə həftə daha davam edəcək və bu müddət ərzində daha sərt və miqyaslı hərbi əməliyyatlar həyata keçirilə bilər. O bildirib ki, İran hazırda qarşıdurmanın diplomatik və hərbi təzyiq baxımından həlledici mərhələsinə keçməkdədir.
“Müharibə hələ bitməyib. Əksinə, qarşıdakı günlərdə münaqişənin daha geniş və təsirli mərhələsinə şahidlik edəcəyik,” – deyə rəsmi vurğulayıb.
Bu açıqlama son günlərdə İsrailin və İranın bir birini qarşılıqlı raket və dron hücumlarına məruz qoyduğu bir zamanda səslənib. Hər iki tərəfdən itkilərin artması və mülki ərazilərin də zərbə altına düşməsi vəziyyətin daha da kəskinləşdiyini göstərir.
Analitiklər hesab edirlər ki, bu bəyanat regionda davam edən münaqişənin tammiqyaslı müharibəyə çevrilmə ehtimalını gücləndirir. Bu xüsusilə ABŞ, Rusiya və digər beynəlxalq güclərin vasitəçilik təşəbbüslərinin nəticə vermədiyi bir vaxtda gəlir.
İran rəsmisinin çıxışı həm də Tehranın qətiyyətli şəkildə geri çəkilmək niyyətində olmadığını və öz strateji planlarını növbəti mərhələyə keçirməyə hazırlaşdığını göstərir.
Hazırda bütün diqqət Tehranın və Təl-Əvivin qarşılıqlı cavab addımlarına yönəlib. Müharibənin hansı istiqamətdə inkişaf edəcəyi, yeni cəbhələrin açılıb-açılmayacağı və beynəlxalq reaksiyanın nə olacağı yaxın günlərdə müəyyənləşəcək.
Musavat.com
