“Ermənistan və Azərbaycan arasında sülh razılaşması ABŞ-nin milli təhlükəsizliyi üçün kritik önəm kəsb edir”.
KONKRET.az Oxu.Az-a istinadən xəbər verir ki, bunu ABŞ Senatının Beynəlxalq Münasibətlər Komitəsinin üzvü, senator Stiv Deyns “77 WABC” radiostansiyasına müsahibəsində bildirib.
“Azərbaycan və Ermənistan hazırda sülh sazişinin imzalanması mərhələsindədir və faktiki olaraq Mərkəzi Asiyada kritik neft, təbii qaz və faydalı qazıntılara çıxışın açılması üzrə əməkdaşlığa başlayırlar” , – deyə o bildirib.
Senator Zəngəzur dəhlizinin geosiyasi əhəmiyyətini vurğulayıb:
“Bu dəhliz vasitəsilə Mərkəzi Asiyanın beş ölkəsi istiqaməti Rusiya və Çin əvəzinə Avropa və Qərbə doğru götürmək ərəfəsindədir. Bu, kritik və vacib bir məqamdır”.
Stiv Deyns may ayında Azərbaycana etdiyi səfəri xatırladıb:
“Mən may ayında orada oldum, Azərbaycan Prezidenti İlham Əliyevlə görüşdüm, sonra Ermənistana yollandım və Baş nazir Nikol Paşinyanla görüşdüm. Onlar bu sülh müqaviləsini əldə etmək ərəfəsindədirlər”.
Amerikalı senator vurğulayıb ki, bu proses Rusiya və İranı narahat edir:
“Bu, təkcə Birləşmiş Ştatlar üçün deyil, Qərb üçün də bəzi mühüm dividendlər qazandıra biləcək başqa bir “Avraam razılaşmaları”na bənzəyir. Təbii ki, Rusiya və İran bundan məmnun deyil”.
