İTALİYADA GÜCLÜ MEŞƏ YANĞINI DAVAM EDİR » AzadMedia.az

İtaliyanın cənubunda yerləşən Vezuv Milli Parkında cümə günündən bəri davam edən güclü meşə yanğınları ilə mübarizə bazar günü də davam edib. Yüksək temperatur və güclü küləklərin təsiri ilə alovlar sürətlə yayılaraq Terzigno meşələrindən Somma dağının 1 050 metr hündürlüyünədək yüksəlib. Hazırda hadisə nəticəsində yaşayış məntəqələrinə və insanlara zərər dəymədiyi bildirilir.

İtaliyanın milli yanğınsöndürmə xidməti 12 yerüstü briqada və 6 “Canadair” tipli yanğınsöndürmə təyyarəsi ilə alovların qarşısını almağa çalışır. Əlavə qüvvələr digər bölgələrdən cəlb edilib, dronlar isə yanğının yayılma istiqamətini izləmək üçün istifadə olunur. Ordunun texnikası və onlarla Mülki Müdafiə könüllüsü də əməliyyatlara dəstək verir.

Təhlükəsizlik məqsədilə Vezuv Milli Parkının bütün turist marşrutları bağlanıb. Park rəhbərliyi yanğının söndürülməsi və ərazinin təmizlənməsi işləri başa çatana qədər fəaliyyətin dayandırıldığını açıqlayıb. 2024-cü ildə vulkan kraterinə təxminən 620 min turistin baş çəkdiyi qeyd olunur.

Yanğın tüstüsü Pompey arxeoloji ərazisindən də görünsə də, tarixi abidə kompleksi ziyarətçilər üçün açıq qalır. Mütəxəssislər Avropada artan istilik dalğalarının iqlim dəyişikliyi fonunda meşə yanğınlarına qarşı həssaslığı artırdığını bildirirlər.
Oxşar vəziyyət Aralıq dənizi hövzəsinin digər ölkələrində də müşahidə olunur. Yunanıstanda, Afinanın cənubunda yerləşən Palaia Fokaia və Keratea bölgələrində alovlar yaşayış evlərinə,və turist zonalarına ziyan vurub.

Türkiyədə isə meşə yanğınları səbəbindən Dardanel boğazı dəniz nəqliyyatı üçün müvəqqəti bağlanıb. Bu su yolu, Bosfor boğazı ilə birlikdə, Avropa və Asiya arasında mühüm ticarət marşrutu hesab olunur.