Şimali Koreya lideri Kim Çen In avqustun 18-də başlayan ABŞ və Cənubi Koreyanın illik birgə hərbi təlimlərini ölkəsinə qarşı düşmən münasibətinin təzahürü adlandırıb və ölkəsinin nüvə arsenalını sürətlə artırmalı olduğunu deyib...
Poliqon xəbər verir ki, bu barədə Şimali Koreyanın dövlət xəbər agentliyi KCNA məlumat yayıb.
"Şimali Koreya ətrafında təhlükəsizlik vəziyyəti hər gün daha ciddiləşir və bizdən hərbi nəzəriyyə və praktikada köklü və sürətli dəyişikliklər etməyi, həmçinin nüvə silahlarının arsenalının sürətləndirilmiş şəkildə artırılmasını tələb edir", deyə Kim ölkənin Hərbi Dəniz Qüvvələrinin bu yaxınlarda buraxılmış yeni esminesi Choe Hyon-a baxış zamanı bildirib.
O, bir gün əvvəl başlayan ABŞ və Cənubi Koreyanın illik birgə hərbi təlimləri olan "Ulçi Azadlıq Qalxanı"nı müttəfiqlərin Şimali Koreyaya qarşı düşmənçilik və qarşıdurma münasibətinin təzahürü və regionda müharibəni qızışdırmaq niyyətlərinin sübutu adlandırıb (müttəfiqlərin təlimlərinin müdafiə xarakterli olmasına baxmayaraq-red.).
Kimin sözlərinə görə, son vaxtlar təhlükəsizlik riskləri Vaşinqton və Seulun hərbi manevrlərinə nüvə komponentinin planlaşdırılmış şəkildə cəlb olunması ilə bağlı artıb və bunu onlar Şimali Koreyadan gələn nüvə təhlükələrinin artması ilə izah edirlər. Ayrı-ayrılıqda Şimali Koreya lideri dəniz qüvvələrinə işarə edərək, yaxın gələcəkdə Hərbi Dəniz Qüvvələrinin güclənəcəyini və ölkənin nüvə güclərində öz rolunu oynayacağını bildirib.
"Regionda sabitliyin qorunmasının, Şimali Koreyanın suverenliyinin və təhlükəsizliyinin qorunmasının ən etibarlı və davamlı yolu və təminatı ölkəmizin düşmənlərinə qorxu aşılamaqdır və milli müdafiə strategiyasına bu yanaşma dəyişməz qalacaq", deyə Kim vurğulayıb.
Amerikanın ixtisaslaşmış təşkilatlarına görə, Şimali Koreyanın 50-yə yaxın nüvə başlığı ola bilər və ümumilikdə ölkə 90-a qədər döyüş başlığı yaratmaq üçün zənginləşdirilmiş radioaktiv materiala malikdir.
Poliqon.info
