ain.az, Bizim media portalına istinadən məlumat verir.
Son günlərdə Ermənistanda Rusiya əleyhinə aksiyalar geniş vüsət almağa başlayıb. Belə ki, ötən həftə sonu Ermənistanın Gümrü şəhərində Rusiyanın 102-ci hərbi bazasının tamamilə çıxarılması tələbi ilə etiraz aksiyası keçirilib. Hərbi baza yaxınlığında keçirilən aksiyanı “Respublika naminə” Partiyası və onun tərəfdarları təşkil edib. Sözügedən partiyanın sədri Arman Babacanyan 102-ci bazanın Ermənistanın təhlükəsizliyini təhdid etdiyini bildirərək, bu səbəblə onun ölkədən çıxarılmasını tələb edib.Qeyd edək ki, İrəvanın 44 günlük müharibədə və 2023-cü ilin bir günlük döyüşlərində ağır məğlubiyyətindən sonra Ermənistanda Rusiya əleyhinə aksiyalar geniş vüsət almağa başlayıb və 2026-cı ilin seçkiləri ərəfəsi mövcud tendensiya daha intensiv xarakter almaqdadır. Bu mənada 102-ci hərbi bazanın çıxarılması da məhz həmin etirazların tərkib hissəsidir.Görəsən, İrəvan 102-ci baza ilə bağlı istəyinə nail olacaq?Mövzu ilə bağlı Bizim.Media-ya açıqlamasında Milli Məclisin deputatı Hikmət Babaoğlu bildirir ki, Ermənistan əhalisinin yarısı Rusiya hərbi bazası ilə bağlı imzalanan sənədi legitim hesab etmir:“Gümrü şəhərində yerləşən Rusiyaya məxsus 102-ci bazanın statusu dövlətlərarası müqavilə ilə müəyyənləşib. Məsələnin hüquqi və siyasi tərəfinə gəldikdə, həmin bazanın Ermənistanda mövcud olması iki ölkə arasındakı münasibətlər baxımından qanunidir. Hazırda Ermənistan əhalisinin təxminən yarısı hesab edir ki, Rusiya hərbi bazası ilə bağlı imzalanan sənəd legitim deyil. Ona görə ki, zəif Ermənistan güclü Rusiya qarşısında təzyiq vasitəsilə belə bir anlaşma imzalayıb. Məsələnin hüquqi baxımdan mübahisə yaradan tərəfi də budur. Bu səbəbdən Ermənistanda Rusiya hərbi bazasının olması əleyhinə aksiyalar keçirilir”.Paşinyanın “real Ermənistan”ıDeputat qeyd edir ki, Paşinyan 2026-cı ildə özü üçün yeni siyasi uğuru təmin edərsə, Rusiyaya qarşı bənzər aksiyalar daha intensiv xarakter alacaq:
“Çünki Paşinyan elan etdiyi “real Ermənistan” ideyasına həm də ərazisində heç bir xarici hərbi baza olmayan müstəqil Ermənistan dövləti kimi baxır. Paşinyan bu günlərdəki çıxışında elan etdi ki, “real Ermənistan” artıq ideya deyil, erməni xalqının milli ideologiyasına çevrilməkdədir”.Həmsöhbətimiz düşünür ki, mövcud şəraitdə Rusiya hərbi bazasının ölkədən çıxarılması mümkün görünməsə də, bütün hallarda keçirilən belə aksiyalar seçkilərə gedən yolda antirusiya meylli qüvvələrin Paşinyan komandası ətrafında konsolidasiyası deməkdir:“Amma onların mövqeyi hələlik rusiyapərəstlər qədər güclü olmadığından hazırkı şəraitdə daha kütləvi tədbirlər keçirə bilmirlər”. Deputat zənn edir ki, indiki vəziyyətdə Rusiya hərbi bazasının çıxarılması mümkün deyil:“Bu, yalnız 2026-cı ildən sonra mümkün ola bilər”.Nə qədər paradoksal görünsə də, H. Babaoğlunun fikrincə, bu həm də Zəngəzur dəhlizinin açılması ilə əlaqləndirilməlidir:
“Rusiya baş nazirinin müavini Overçukun Ermənistana səfərinə şahidlik etdik. Danışıqlar çox da kəskin olmadı. Rusiya başa düşdü ki, Zəngəzur dəhlizinə hərbi nəzarətdən söhbət getmir. Rusiya iqtisadi mənafeyini imperalist maraqlarından üstün tutarsa, özü də Zəngəzur dəhlizi kommunikasiyasından istifadəçi kimi yararlana bilər.
Beləliklə də, onlar 102-ci hərbi bazanın Ermənistanda qalmasının əhəmiyyətsizliyini dərk edərək, müqavilə şərtlərində nəzərdə tutulan illəri gözləmədən, vaxtından əvvəl ərazini tərk edə bilərlər”.Rüfət Sultan, Bizim.Media
Daha ətraflı məlumat və yeniliklər üçün ain.az saytını izləyin.
