Gürcüstan Daxili İşlər Nazirliyinin Miqrasiya İdarəsinin əməkdaşları Rusiya vətəndaşları da daxil olmaqla 22 əcnəbini deportasiya edib.
NOCOMMENT.az bildirir ki, bu barədə idarənin mətbuat xidmətindən məlumat verilib.
Daxili İşlər Nazirliyindən verilən məlumata görə, son günlər həyata keçirilən tədbirlər nəticəsində Gürcüstandan Misir, Hindistan, İordaniya, İran, Keniya, Rusiya, Suriya, Türkiyə, Türkmənistan və Pakistan vətəndaşları çıxarılıb. Deportasiya edilmiş şəxslərin respublikaya gəlməsi qadağandır.
Avqustun 19-da respublikanın Daxili İşlər Nazirliyi 30 əcnəbinin deportasiya edilməsi barədə məlumat yayıb. Onların arasında Rusiya vətəndaşları da olub.
Gürcüstan son vaxtlar qeyri-qanuni miqrantlara qarşı fəal mübarizə aparır. Ölkə parlamenti miqrasiya qanunvericiliyini sərtləşdirib, deportasiya prosedurlarını və miqrantların axtarışını sadələşdirib. Gürcüstan Daxili İşlər Nazirliyi hər ay onlarla əcnəbi vətəndaşın ölkədən çıxarılması barədə məlumat verir.
