Son illərdə Azərbaycanda orta ixtisas təhsili müəssisələrində təhsil alan xarici tələbələrin sayı əhəmiyyətli dərəcədə artıb.
AzEdu.az-ın Dövlət Statistika Komitəsindən aldığı məlumata görə, 2024-2025-ci tədris ilində ölkənin dövlət və qeyri-dövlət orta ixtisas təhsili müəssisələrində ümumilikdə 176 xarici tələbə təhsil alır. Bu göstərici əvvəlki illərlə müqayisədə artım tendensiyasını davam etdirir.
Statistikaya əsasən, hazırda Azərbaycanda orta ixtisas təhsili alan xarici tələbələrin böyük əksəriyyəti MDB ölkələrindən gəlir. Son tədris ilində bu regiondan olan tələbələrin sayı 71 nəfər təşkil edib. Onların arasında Rusiya Federasiyasından olan tələbələr 62 nəfər olmaqla üstünlük təşkil edir. Digər MDB ölkələrindən isə Qazaxıstandan 3, Özbəkistandan 1, Moldova, Türkmənistan və Ukraynadan isə hər birindən 1-3 tələbə təhsil alır.
Digər ölkələr kateqoriyasında isə Gürcüstandan gələn tələbələr ən yüksək göstəriciyə malikdir. 2024-2025-ci illərdə Gürcüstandan olan tələbələrin sayı 93 nəfər olub. Bu, əvvəlki illərlə müqayisədə kəskin artım deməkdir. Gürcüstanı İran İslam Respublikası (6 nəfər), Türkiyə (3 nəfər), Əfqanıstan və Pakistan (hər birindən 1 nəfər) izləyir. Qırğızıstandan isə bu tədris ili ərzində heç bir tələbə qeydiyyatda deyil.
Ümumilikdə, 2005-2006-cı illə müqayisədə (129 nəfər) xarici tələbələrin sayı 2024-2025-ci ildə 47 nəfər artaraq 176-ya çatıb. Mütəxəssislər bu artımı Azərbaycanın təhsil sisteminə olan beynəlxalq maraq və ölkədə yaradılan əlverişli təhsil imkanları ilə əlaqələndirirlər.
