Azərbaycan Premyer Liqasında mübarizə aparan “Turan Tovuz”un müdafiəçisi Emmanuel Hakman Toqo milli komandasına dəvət alıb.
Arena.az xəbər verir ki, bu barədə Tovuz klubunun mətbuat xidməti məlumat yayıb.
Xəbərdə bildirilir ki, futbolçu növbəti 2 oyununda yığma komandanın sərəncamında olacaq. Toqo millisi DÇ-2026-nın seçmə mərhələsi çərçivəsində sentyabrın 5-də Mavritaniya, sentyabrın 9-də isə Sudanla qarşılaşacaq. İlk oyun səfərdə, digər görüş doğma meydanda baş tutacaq.
Xatırladaq ki, Emmanuel Hakman peşəkar karyerasına Portuqaliyanın “Vila Real” klubunda başlayıb. Daha sonra o, bu ölkədə “Boavişta”, “Aveş”, “Portimonense”, “Jil Visente” kimi klubların da formasını geyinib. Müdafiəçi “Turan Tovuz”dan öncə Serbiyada “Mladost”un şərəfini qoruyub. Tovuz klubuna 2023-cü ilin sentyabr ayında azad agent kimi qoşulmuş toqolu mərkəz müdafiəçisi bu komandada indiyə qədər 64 oyuna çıxıb, 4 qol vurub, 4 məhsuldar ötürmə ilə yadda qalıb.
Hakman 2022-ci ilin mart ayında debüt matçına çıxdığı Toqo milli komandasının heyətində 8 oyun keçirib. 29 yaşlı futbolçu bu oyunlarda məhsuldar fəaliyyəti ilə diqqət çəkməyib.
