Demokrat.az-ın əldə etdiyi xəbərə görə, hadisə bu ilin yanvarın 23-də rayonun kəndlərindən birində baş verib. Kənd sakini, 1992-ci il təvəllüdlü Əhməd həmin gün saat 15 radələrində həyat yoldaşı Tahirə (adlar şərtidir – red._ ilə mübahisə edib.
Müəyyən edilib ki, məlum hadisədən əvvəl Tahirə Əhmədin spirtli içkilərə qurşandığına, ailəsinə baxmadığına, onlara maddi yardım etmədiyinə iradlarını bildirib və iki azyaşlı uşaqlarını götürərək onlarla birlikdə anasının yaşadığı evə gedəcəyi barədə bildirib.
Əhməd isə buna etiraz edib və ailə-məişət münasibətləri zəminində arvadı ilə mübahisə edib. Yaranmış münaqişə nəticəsində evin eyvan hissəsində arvadının boğaz nahiyəsindən əlləri ilə tutaraq onu boğub, fiziki ağrı yetirib.
Daha sonra mal-qaranı örüşə aparmaq üçün istifadə etmək məqsədi ilə eyvanda saxladığı ağac parçasını götürüb və onunla arvadının bədənin müxtəlif nahiyələrindən vurub.
Hadisəni törədən Əhmədin barəsində Cinayət Məcəlləsinin 128-ci (qəsdən sağlamlığa zərər vurma) maddəsi ilə ittiham elan edilib.
İş üzrə izahat verən təqsirləndirilən şəxs ona elan olunmuş ittiham üzrə özünü təqsirli bilib. O, ifadəsində göstərib ki, arvadı Tahirə ilə 4 ildir evlidirlər: “Birgə nikahımızdan iki azyaşlı qız övladımız var. Arvadım evdə mənimlə yola getməyib, tez-tez anasının evinə gedib, orada həftələrlə qalıb. Buna görə arvadım ilə aramızda mütəmadi olaraq münaqişə yaranıb”.
Təqsirləndirilən şəxs qeyd edib ki, sonuncu dəfə yanvarın 23-də, saat 15 radələrində işdən evə yorğun gəlib, yorğunluğunu çıxartmaq üçün evdə 250 qram spirtli içki qəbul edib: “Bundan sonra arvadım təkrarən bildirdi ki, anasının evinə getmək istəyir, mənimlə daha yaşamaq istəmir. Arvadımın bu hərəkətlərindən əsəbləşərək əvvəlcə əllərim ilə onun boğazından tutaraq sıxdım. Daha sonra eyvanda əlimə keçən ağac parçasını götürdüm və onun ayaq, bədəninin müxtəlif nahiyələrinə vurdum. Səs-küyə həyətdə olan qardaşım hadisə yerinə gəldi və arvadımı uşaqlarla birlikdə anasının yaşadığı digər kəndə yola saldı”.
İş üzrə zərərçəkmiş Tahirənin sözlərinə görə, əri təqsirləndirilən şəxs spirtli içkilərə qurşanıb, mütəmadi olaraq evə sərxoş gəlib: “Evə və uşaqlara baxmayıb, heç bir maddi yardım etməyib. Bu səbəbdən özüm və uşaqlarım evdə ac qalmayaq deyə anamın evinə tez-tez getmişik, orada həftələrlə anamın himayəsində yaşamışıq. Lakin ərim anamın evinə getməyimə etiraz etdiyi üçün aramızda tez-tez münaqişə yaranıb. Sonuncu dəfə yanvarın 23-də, saat 15 radələrində evdə olduğum zaman ərim evə gəldi. Özü ilə bir ədəd 250 qramlıq qabda araq gətirdi, onu evdə su qataraq içməyə başladı. Sərxoş olandan sonra məni bir daha anam evinə qoymayacağını bildirdiyi üçün ona etiraz etdim. Sərxoş olmasına, ailəsinə baxmamağa görə irad tutdum, anam evinə gedəcəyimi dedim. Təqsirləndirilən şəxs də özündən çıxaraq evin eyvan hissəsində üstümə hücum çəkdi. Əvvəlcə əlləri ilə boğazımdan tutaraq sıxdı. Sonra mal-qaranı örüşə aparmaq üçün istifadə etmək məqsədi ilə eyvanda saxladığı ağac parçasını götürdü və məni döydü”.
Bu cinayət işinə Cəlilabad Rayon Məhkəməsində baxılıb. Məhkəmədə məlum olub ki, təqsirləndirilən şəxs zərərçəkmişlə barışıb. Bundan savayı zərərçəkmiş şəxs ərini bağışlayıb, ona qarşı olan şikayətini geri götürüb.
Bu halları nəzərə alan hakim Cinayət Məcəlləsinin 73.2-ci maddəsini tətbiq edib və təqsirləndirilən şəxsin barəsində olan cinayət təqibinə xitam verib. O, cinayət məsuliyyətindən azad edilib.
Fariz Məlikli
Demokrat.az
