İsrail Müdafiə Qüvvələri (IDF) və Ümumi Təhlükəsizlik Xidməti (Şin Bet) 2023-cü il oktyabrın 7-də yəhudi dövlətinə hücum zamanı radikallar tərəfindən ələ keçirilən iki girovun cəsədini Qəzza zolağından geri qaytarıb. Bu barədə İsrailin Baş naziri Benyamin Netanyahunun ofisi məlumat yayıb.
Məlumatda deyilir: "İDF və Şin Bet tərəfindən Qəzza zolağında həyata keçirilən əməliyyat zamanı HƏMAS terror təşkilatı tərəfindən saxlanılan mərhum İlan Vaysın cənazəsi İsrailə qaytarılıb. Əməliyyat zamanı adı hələ açıqlanmayan daha bir girovun qalıqları da qaytarılıb. Hazırda Ədliyyə Müfəttişliyi İnstitutunda qalıqların şəxsiyyəti müəyyənləşdirilir".
Ofis qeyd edib ki, İlan Vays Qəzza zolağı ilə sərhəddə yerləşən Beeri kibutsunun təhlükəsizlik qüvvələrində çalışıb. "O, 2023-cü il oktyabrın 7-də kibutsun müdafiəsinə çıxdığı zaman öldürülüb və cəsədi qaçırılıb" deyən idarə, Vaysın həmin gün oğurlanmış həyat yoldaşı Şiri və qızı Noqanın "2023-cü ilin noyabrında əsirlikdən azad edildiyini" bildirib.
Netanyahu qeyd edib ki, “girovların qaytarılması uğrunda mübarizə fasiləsiz davam edir”. “Biz oğurlanmış bütün insanları – həm diri, həm də ölü - evə gətirənə qədər dincəlməyəcəyik və səssiz qalmayacağıq”, o əlavə edib.
Baş nazirin açıqlamaları onun ofisi tərəfindən yayılıb. İsrail tərəfinin məlumatına görə, Qəzza zolağında radikallar 20-si sağ olmaqla 48 nəfəri girov saxlamağa davam edir.
Rizvan CƏFƏROV,
“Azərbaycan”
