Türkiyə ilə İsrail arasında münasibətlər son aylarda sürətlə gərginləşir. Ankara Qəzzada davam edən müharibəyə görə Tel-Əvivə qarşı ticarət embarqosu tətbiq etməklə yanaşı, İsrail təyyarələri üçün hava məkanını da bağladığını rəsmən açıqlayıb.
Xarici işlər naziri Hakan Fidanın parlamentdə verdiyi bu bəyanat, iki ölkə arasında diplomatik gərginliyi yeni səviyyəyə daşıyıb.
Türkiyənin həm Qəzzada baş verənlərə, həm də Suriyada İsrailin artan hava zərbələrinə qarşı sərt mövqeyi, bölgədə Ankara-Tel-Əviv qarşıdurması ehtimalını gündəmə gətirib. Analitiklərə görə, xüsusilə Suriyanın hava məkanında son zamanlar müşahidə edilən aktivlik fonunda, iki ölkənin maraqları daha tez toqquşa bilər.
Maraqlıdır görəsən, bütün bunlar iki ölkə arasında qarşıdurmaya səbəb ola bilərmi? Turkustan.az olaraq bu sualımızı Ədalət, Hüquq, Demokratiya (ƏHD) Partiyası İdarə Heyətinin üzvü, siyasi şərhçi Əli Zülfüqaroğluna ünvanladıq.
Əli Zülfüqaroğlu
İsrailin genişlənmə siyasəti Türkiyəni təhdid edir. Təl-Əvivin Fələstin və Livanla bağlı yürütdüyü siyasətlə yanaşı Suriyanı parçalamağa yönəlik addımları Türkiyəni ciddi şəkildə narahat edir. Ankara hesab edir ki, Təl-Əvivin "Böyük İsrail" strategiyası üzərindən yürütdüyü siyasətin son hədəfi Türkiyədir. Yəni Suriya bölünərsə, Türkiyənin ərazi bütövlüyü təhlükəyə girəcək. Bunu təsdiqləyən faktor İsrailin YPG-yə maksimum dəstək verməsidir.
İsrail isə hesab edir ki, Türkiyə Suriyada möhkəmlənə və bu ölkənin ərazi bütövlüyü təmin edilərsə, o zaman sionizm ideologiyası çökəcək. Yəni İsrailin ərazilərini genişləndirmə siyasəti iflasa uğrayacaq. Nəticədə sionist qüvvələr İsrail hakimiyyətindən gedəcək. Ona görə də maksimum çalışır ki, Ankara-Vaşinqton münasibətlərini pozsun və ABŞ-ni Suriyada Türkiyəyə qarşı qoysun. Ona görə də, Suriyanın ərazi bütövlüyü Türkiyənin qırmızı xəttidir və əgər Suriya bölünmə təhlükəsi ilə üzləşərsə, o zaman Türkiyənin hərbi müdaxiləsi qaçılmaz olacaq. Bununla da Türkiyə ilə İsrail arasında birbaşa hərbi toqquşma riski yaranacaq.
Əgər bu baş verərsə, İsrail birmənalı olaraq qısa müddət ərzində məğlub olacaq. Çünki İsrail ordusunun quru gücü zəifdir və Türkiyə ordusunun qarşısında dayana bilməz. Digər tərəfdən diplomatik müstəvidə də Türkiyə beynəlxalq dəstək əldə edəcək. Ona gorə ki, İsrail hökuməti cinayətkar hesab edilir və beynəlxalq təzyiq altındadır. ABŞ də bunu bildiyi üçün iki müttəfiqi arasında hərbi toqquşma riskini önləməyə çalışır. Bu məsələdə də ABŞ hökuməti ikiyə bölünüb.
ABŞ milli qüvvələri Türkiyəni, sionist lobbinin təsiri altında olan qüvvələr isə İsraili dəstəkləyir. Tramp də bütün dünya kimi Netanyahudan qurtulmağa çalışır. Netanyahu da hakimiyyətinin sona çatdığını bildiyi üçün Yaxın Şərqi xaosa sürükləmək və beləliklə də müharibə coğrafiyasını genişləndirmək üçün hər şey edəcək.
Aytən Yaşar/ Turkustan.az
