Konqo Demokratik Respublikasının Səhiyyə Nazirliyi ölkədə yeni Ebola virusunun yayıldığını açıqlayıb. Bu barədə Actu30 portalı məlumat yayıb.
Virusun yaratdığı xəstəliyin Kasai əyalətində yayıldığı açıqlanıb.
"Səhiyyə orqanlarının məlumatına görə, Bulape və Mveka tibb rayonlarında 28 xəstəliyə yoluxma halı qeydə alınıb", - nəşr qeyd edib.
15 xəstəni xilas etmək mümkün olmayıb.
Ebola virusu vəhşi heyvanlar tərəfindən ötürülür və sonra insanlar arasında yayılır. Ebolanın ilkin simptomları arasında qızdırma, əzələ spazmları, baş ağrısı və boğaz ağrısı var. Bunun ardınca qaraciyər və böyrək funksiyaları pozulur, bəzi hallarda daxili və xarici qanaxmalar baş verə bilər.
Aprel ayında bildirilmişdi ki, Uolter Rid Hərbi İnstitutunun və digər elmi mərkəzlərin amerikalı alimləri Ebolaya qarşı mövcud vaksinin digər təhlükəli filoviruslardan qoruya bilib-bilmədiyini öyrənmək üçün genişmiqyaslı araşdırma aparıblar.
