Ölkə rəhbərliyi Ali Federal Məhkəmənin (STF) Braziliyanın sabiq lideri Jair Bolsonaronu 27 ildən artıq müddətə azadlıqdan məhrum etməsindən sonra ABŞ-nin mümkün sanksiyalarından narahat deyil.
Operativ Media xəbər verir ki, bunu Braziliya Prezidenti Luiz İnasio Lula da Silva bəyan edib.
“Heç bir narahatlıq yoxdur. Mən qorxmuram”, – dövlət başçısı yerli Band televiziya kanalına müsahibəsində bildirib.
“Bir ölkənin prezidenti digər suveren dövlətin qərarlarına qarışa bilməz. Əgər o, hər hansı addım atmaq qərarına gəlsə, bu, yalnız onun problemi olacaq”.
Lula da Silva əlavə edib ki, Bolsonaronun 2023-cü ilin yanvarında respublikanın hazırkı liderinin hakimiyyətə gəlməsinin qarşısını almaq üçün doğrudan da dövlət çevrilişi təşkil etmək niyyətində olduğuna şübhə yoxdur: “Keçmiş prezident bütün səlahiyyət müddəti ərzində demokratik institutları nüfuzdan salıb”.
Braziliya lideri, həmçinin ölkə Konqresinin federal üzvü və sabiq prezidentin oğlu Eduardo Bolsonaronun ABŞ rəhbərliyini Braziliyaya qarşı sanksiyalar tətbiq etməyə çağırmasını pisləyib. “Onun oğlu ABŞ-dədir və ABŞ-ni Braziliyaya qarşı qoymağa çalışır, bununla da vətəninə xəyanət edir. Bu, Braziliya tarixində indiyədək baş verməyib”, – Lula da Silva vurğulayıb.
