BAKI, 12 sentyabr. TELEQRAF
Əfqanıstanda hakimiyyətdə olan Taliban hərəkatının rəsmiləri Özbəkistan və Tacikistandan hərbi helikopterlərin geri qaytarılmasını tələb edib.
Teleqraf xəbər verir ki, Əfqanıstanın xarici işlər naziri Əmir Xan Müttəqi qonşu ölkələrə - Özbəkistan və Tacikistana müraciət edib. Onun sözlərinə görə, 2021-ci ilin avqustunda Taliban hakimiyyəti ələ keçirən zaman əfqan hərbi pilotları bir neçə helikopterin ölkəni tərk etdiyini və onların qonşu ölkələrə aparıldığını bildiriblər. Kabildə diplomatlar və beynəlxalq təşkilatların nümayəndələri ilə görüşdə Müttəqi təyyarələrin əfqan xalqına qaytarılmasının vacibliyini vurğulayıb:
"Biz bir neçə il əvvəl siyasi dəyişikliklərlə əlaqədar qonşu ölkələrə aparılan vertolyotların geri qaytarılmasını tələb edirik. Onlar yalnız humanitar məqsədlər üçün, xalqın maraqları naminə istifadə olunacaq", - nazir bildirib.
Bundan əvvəl, sentyabrın 8-də “Afganistan International” öz mənbələrinə istinadən xəbər vermişdi ki, Özbəkistan 2021-ci ildə gətirilmiş 57 hərbi helikopteri tezliklə Əfqanıstana qaytara bilər. Sentyabrın 11-də “The Kabul Times” qəzeti Taliban hökumətinin nümayəndəsi Zabihullah Mücahidin “Özbəkistanın təyyarənin geri qaytarılmasına razılıq verdiyini” bildirib.
Lakin Özbəkistan Xarici İşlər Nazirliyi bu məlumatı təkzib edib.
Xatırladaq ki, rəsmi rəqəmlərə görə, 2021-ci ildə Əfqanıstanda hakimiyyət dəyişəndə əvvəlki rejimin hərbçiləri Özbəkistana 22 təyyarə və 24 helikopter göndərmişdi.Əfqanıstanın müvəqqəti hökuməti bu texnikanın geri qaytarılmasını dəfələrlə tələb edib. Lakin Daşkənd hökuməti israr edir ki, bu təyyarələr ABŞ mülkiyyətidir və geri qaytarıla bilməz.
2024-cü ilin avqustunda ABŞ-nin Özbəkistandakı səfiri Conatan Henik bu məsələ ilə bağlı razılığın əldə olunduğunu açıqlayıb. Onun sözlərinə görə, təyyarələr Özbəkistan ərazisində qalacaq, çünki “onlar heç vaxt əfqanlara məxsus olmayıb”.
2025-ci ilin fevralında yayılan məlumata görə, yeddi Black Hawk helikopteri artıq ABŞ-a qaytarılıb və onlarla daha çox texnika Özbəkistanda saxlanılır.
Məlumdur ki, bu hadisə ətrafında mübahisələr hələ də davam edir və Əfqanıstan hökuməti bu məsələ ilə bağlı qonşu ölkələrdən qəti cavab gözləyir.
