Süşila Karki iğtişaşlardan sonra ölkədə sakitliyə və həmrəyliyə dəvət edib...
Poliqon xəbər verir ki, Nepalın yeni baş naziri Süşila Karki ölkədə son günlər baş verən qanlı etirazlardan sonra xalqa müraciət edib. O, vətəndaşları sakitliyə, həmrəyliyə və əməkdaşlığa çağıraraq ölkənin bərpası üçün birlikdə çalışmağın vacibliyini vurğulayıb.
Ölkədə ötən həftə kütləvi etirazlar zamanı baş verən toqquşmalar nəticəsində azı 72 nəfərin həlak olduğu bildirilir. Baş nazir Karki bəyan edib ki, hökumət etirazlarda həyatını itirənlərin ailələrinə 1 milyon rupi (təxminən 11 330 ABŞ dolları) məbləğində kompensasiya ödəyəcək.
73 yaşlı Karki sentyabrın 12-də Nepalın yeni baş naziri təyin olunub. O, ölkənin tarixində bu vəzifəni tutan ilk qadındır. Bundan əvvəl 2016–2017-ci illərdə Nepal Ali Məhkəməsinin yeganə qadın sədri kimi tanınan Karki korrupsiyaya qarşı sərt mövqeyi ilə böyük nüfuz qazanmışdı.
Nepalda siyasi gərginlik fonunda yeni parlament seçkilərinin martın 5-də keçiriləcəyi açıqlanıb. Analitiklər hesab edir ki, Karkinin baş nazir təyin olunması həm cəmiyyətin demokratik gözləntilərinə cavab verən addımdır, həm də hökumətin böhrandan çıxış yolunda islahatlara başlamaq niyyətini nümayiş etdirir.
Poliqon.info
