Azertag saytından alınan məlumata görə, ain.az bildirir.
Praqa, 15 sentyabr, AZƏRTAC
Polşanın hava məkanında Rusiyaya məxsus pilotsuz uçuş aparatları ilə bağlı insident avropalı sərnişinləri uçuşlar üçün daha yüksək qiymətlərlə təhdid edir.
AZƏRTAC xəbər verir ki, ekspertlər bu barədə media vasitəsilə xəbərdarlıq ediblər. Onların fikrincə, məcburi dövriyyə və gücləndirilmiş təhlükəsizlik tədbirləri səbəbindən aviaşirkətlər əlavə xərclərə məruz qalacaq və bu, labüd olaraq biletlərin qiymətinə təsir edəcək.
Məlum olduğu kimi, ötən həftə NATO təyyarələrinin iştirakı ilə Polşa səmasında Rusiyanın bir neçə pilotsuz uçuş aparatı vurulub. Bu, Ukraynada müharibə başlayandan bəri bir müttəfiq ölkənin ərazisinə birbaşa müdaxilə ilə bağlı ilk hadisə idi. Əməliyyat zamanı Varşava Şopen və Modlin hava limanlarının, həmçinin Rzeşov və Lyublin hava limanlarının fəaliyyəti dayandırılıb. Sonradan nəqliyyatın hərəkəti bərpa edilib, lakin Polşa hakimiyyəti dekabrın 9-dək Ukrayna və Belarus sərhədləri yaxınlığında uçuşları məhdudlaşdırıb.
Mütəxəssislərin fikrincə, aviadaşıyıcılar marşrutları tənzimləməli, onları daha çox qərb istiqamətinə yönəltməli, uçuşları əsasən gün ərzində yerinə yetirməli və mümkün sapmalara görə əlavə yanacaq doldurmalı olacaqlar. Oxşar protokollar əvvəllər Yaxın Şərqdə istifadə olunurdu.
Hazırkı eskalasiyadan əvvəl də Avropa aviaşirkətləri Rusiya, Ukrayna, Yaxın Şərqin bəzi hissələri, Cənubi Asiya və Afrikanın hava məkanından yayınırdı. Uçuşun hər əlavə dəqiqəsi orta hesabla 1,56 dollara başa gəlir ki, bu da biletlərin qiymətinə onlarla dollar əlavə edir.
Polşa hadisəsi hava nəqliyyatında qısamüddətli fasilələrə səbəb olsa da, bazarlar dərhal buna reaksiya verdi: “IAG Holding”in (“British Airways” şirkətinin sahibi) səhmləri 4,1%, “Lufthansa”, “easyJet” və “Ryanair” isə təxminən 2,2% ucuzlaşıb. Bu barədə “Reuters” xəbər verir.
Artan geosiyasi gərginlik Avropada səyahətləri bahalaşdırır. Bu, sərnişinlər üçün nəinki daha uzun səyahət vaxtları, həm də aviabiletlərin ehtimal olunan qiymətlərinin artması deməkdir. Bütün bunlar müharibənin gündəlik həyata təsirinin növbəti təzahürüdür.
Vüqar Seyidov
AZƏRTAC-ın xüsusi müxbiri
Praqa
Ən son xəbərləri və yenilikləri almaq üçün ain.az saytını izləyin.
