Hindistan “Qərb-2025” təlimlərində iştirak etmək üçün öz qoşunlarını göndərib.
Turkustan.az xəbər verir ki, bu barədə “Tayms” nəşri yazıb.
Qeyd olunur ki, təlimlərdə təxminən 30 min rus və belarus əsgəri iştirak edir. Onlar ballistik raketlərin buraxılışını və aviazərbələrin imitasiya olunmasını məşq edirlər. Təlimlər geniş ərazidə – Moskvadan şərqdəki bazalardan və Arktikadan tutmuş, Baltik dənizinə və Belarusun qərb sərhədinədək, Polşa və Litvanın sərhədinədək keçirilir.
“Hindistan Müdafiə Nazirliyi bildirib ki, Kumoan polkunun bölmələri də daxil olmaqla, ən hörmətli qoşun hissələrindən olan 65 hərbçi göndərilib. Onlar NATO sərhədlərindən uzaqda – Nijni Novqorodun qərbində, təxminən 85 km məsafədə yerləşən Mulino poliqonunda dislokasiya olunublar”, – materialda bildirilir.
Dehlinin açıqlamasına görə, məqsəd müdafiə əməkdaşlığını gücləndirmək və Hindistanla Rusiya arasında dostluq münasibətlərini möhkəmləndirməkdir.
Vurğulanır ki, Hindistan hərbçiləri rus əsgərləri ilə birlikdə təlimlərdə, taktiki məşqlərdə və xüsusi silahlardan istifadə üzrə hazırlıqda iştirak edəcəklər.
Nəşr xatırladır ki, Hindistan 2022-ci ildə Rusiyanın Ukraynaya genişmiqyaslı işğalından əvvəl də “Qərb” təlimlərində və daha sonra bir neçə digər təlimdə iştirak etmişdi. Lakin analitiklərin fikrincə, NATO ilə Rusiya arasında gərginliyin artdığı bir vaxtda bu dəfəki təlimlərə qoşulmaq qərarı narahatedici mesajdır.
Almaniyalı xarici siyasət analitiki Ulrix Spek isə hesab edir ki, Hindistan bu addımı ilə “qırmızı xətti” keçib.
Qeyd edək ki, sözügedən əməliyyat sentyabrın 12-də başlayıb. /axar.az/
