Lüksemburqun baş naziri Lyuk Friden və xarici işlər naziri Ksavye Bettel parlament komissiyasına Fələstin Dövlətini BMT Baş Assambleyasında tanımaq niyyətində olduqlarını bildiriblər. Bu barədə Lüksemburqun RTL telekanalı xəbər verib. Tədbir 23 sentyabrda Nyu-Yorkda keçiriləcək.
Telekanal dəqiqləşdirib ki, Fələstinin tanınması məsələsi Lüksemburqda uzun müddətdir müzakirə olunur. Ölkədə “uyğun məqam” gözlənilirdi. Cənab Friden qeyd edib ki, qəbul edilən qərarı bütün nazirlər kabineti dəstəkləyir.
RTL-in məlumatına görə, bazar ertəsi ərəb dövlətinin tanınması ilə bağlı qərar elan edildikdən sonra Lüksemburq Nümayəndələr Palatasının binası qarşısında hökumətin qərarını alqışlayan fələstinlilərin tərəfdarları mitinq keçiriblər. Həmçinin ölkədə, maliyyə sektoruna nəzarət üzrə komissiyanın hersoqluqda İsrail dövlət istiqrazlarının yerləşdirilməsi ilə bağlı son bəyanatına etiraz aksiyaları da baş tutub.
Bundan əvvəl Fransada, Belçikada, Kanadada və Böyük Britaniyada sentyabr Baş Assambleyasında Fələstinin tanınması imkanından bəhs olunmuşdu. Beləliklə, beynəlxalq ictimaiyyət İsrail ordusunun Qəzza zolağındakı hərəkətlərinə reaksiya verir. Bununla yanaşı, Qərb siyasətçiləri hazırda anklava nəzarət edən “Həmas” hərəkatına da tələblər irəli sürürlər. Onların arasında silahların təhvil verilməsi və qalan israilli girovların azad edilməsi var.
