Bloomberg-in məlumatına görə, İsrail şirkətlərinin səhmləri Qəzza zolağında vəziyyətin gərginləşməsi fonunda ardıcıl beşinci gün ucuzlaşıb. Bu, bölgədə müharibənin dayanacağına ümid edən investorların əhvalına mənfi təsir edib.
Təl-Əviv Fond Birjasının indeksi — Tel Aviv Stock Exchange 35 Index (TA-35) — 16 sentyabr ticarətində 2.3% azalaraq 2988.03 bəndə enib. Qeyd edək ki, bu indeks birjada kapitallaşmaya görə ən böyük 35 şirkəti birləşdirir.
Çərşənbə axşamı Bakı vaxtı ilə saat 15:02-yə qədər azalma 0.6%-ə qədər zəifləyib və indeks 3039.31 bəndə qalxıb.
Axios nəşri İsrail rəsmilərinə istinadən yazır ki, İsrail ordusu Qəzza şəhərində qurudan hücuma başlayıb və onu işğal etməyi planlaşdırır. Nəşr qeyd edib ki, əməliyyat ABŞ dövlət katibi Marko Rubionun İsrail rəhbərliyi ilə görüşündən bir neçə saat sonra başlayıb. Qəzza şəhərinin bir milyon sakinindən təxminən 300 min nəfər oranı tərk edib.
“Sonsuz müharibələr itirilmiş iqtisadi artım, insan kapitalının axını, beynəlxalq münasibətlərin pisləşməsi, daxili siyasi qütbləşmənin güclənməsi və bəlkə də təhlükəsizlik sahəsində yaxşılaşmaların olmaması bahasına başa gəlir – bunların hamısı İsrail aktivlərinin qiymətinə təsir edir”, – mesajda deyilir.
İsrail Baş naziri Benyamin Netanyahunun ölkəni daha çox iqtisadi avtarxiyaya (dövlətin tam iqtisadi müstəqilliyi və öz-özünü təmin etməsi) hazır olmağa çağıran son çıxışı bu narahatlıqları gücləndirir.
