Ukraynada davam edən müharibədən sonra yenidənqurma işlərinə çəkilən xərclərlə bağlı təəccüblü hesabat açıqlanıb.
Hafta.az-ın “The American Conservative”a istinadən yazdığına görə, Dünya Bankı, Avropa Komissiyası, Birləşmiş Millətlər Təşkilatı və Ukrayna hökumətinin birgə hazırladığı əhatəli hesabatda müharibədən sonrakı bərpa işlərinin ümumi dəyəri təxminən 524 milyard dollar təşkil edib.
Hesabatda vurğulanır ki, beynəlxalq ictimaiyyətin, xüsusilə də Qərb ölkələrinin bu böyük maliyyə yükünün əsas hissəsini çiyinlərinə götürməsi gözlənilir.
Ukraynanın keçmiş baş naziri Denis Şmıqal daha əvvəl yenidənqurma xərcləri ilə bağlı oxşar rəqəm təqdim edərək, bunun 500 milyard avroya başa gələcəyini hesablamışdı. Şmıqal bu maliyyənin böyük ölçüdə Avropa şirkətlərinin investisiyaları hesabına təmin oluna biləcəyini bildirərək, yenidənqurmanın Avropa üçün təkcə maliyyə yardımı deyil, həm də böyük iqtisadi fürsət olduğunu vurğulamışdı. Keçmiş baş nazir demişdi ki, Ukrayna təkcə Avropaya iqtisadi imkanlar təqdim etməyəcək, həm də pilotsuz uçuş aparatları, kibertəhlükəsizlik və müharibə zamanı inkişaf etdirilən müxtəlif müdafiə texnologiyaları sahəsində təcrübəsini və nou-haunu bölüşəcək.
“Bloomberg Economics”in ekspertlərinin ayrıca təhlili ümumi xərclərin miqyasını daha da aydınlaşdırır. Ekspertlərin fikrincə, təkcə Ukraynanın müharibə nəticəsində zədələnmiş nəqliyyat, enerji, rabitə və əsas kommunal infrastrukturunu təmir etmək üçün təxminən 230 milyard dollar xərcləməli olacaq. Bu rəqəm ümumi yenidənqurma xərclərinin təxminən yarısını təşkil edir və münaqişənin ölkənin fiziki infrastrukturuna vurduğu dağıntıların miqyasını göstərir.
