Norveç Mərkəzi Bankı uçot dərəcəsini 4,25 faizdən 4 faizə endirib. Bu, bankın cari il ərzində borclanma xərclərini ikinci dəfə azaltması deməkdir. Lakin qurum inflyasiya səbəbindən növbəti azalmaların daha ehtiyatlı və yavaş templə həyata keçiriləcəyinə işarə edib.
Marja xəbər verir ki, Bankın cümə axşamı verdiyi məlumata görə, qərar bazar gözləntilərinə uyğun gəlib — Bloomberg-in keçirdiyi sorğuda iştirak edən 19 analitikdən 12-si məhz bu addımı proqnozlaşdırmışdı, qalanları isə dərəcənin dəyişməyəcəyini düşünürdü.
Norveç Mərkəzi Bankının rəhbəri İda Volden Baxe açıqlamasında bildirib ki, iyun ayından bəri daxil olan göstəricilər iqtisadiyyatda bir qədər ehtiyat potensialın mövcud olduğunu, lakin inflyasiyanın gözləniləndən daha uzun müddət yüksək səviyyədə qala biləcəyini göstərir.
Onun sözlərinə görə, bu səbəbdən uçot dərəcəsi əvvəlcədən nəzərdə tutulduğu qədər sürətlə endirilməyəcək.
