Misir ordusu Qəzza Sektoruna və İsrail sərhədinə yerləşdirilən hərbi qüvvələri tam döyüş hazırlığına gətirib. Bu barədə Qətərin Al-Araby Al-Jadeed qəzeti məlumat yayıb.
Məlumata görə, ordunun döyüş hazırlığına gətirilməsi qərarı iki gün əvvəl İsrail ordusunun Qəzza şəhərində başlatdığı quru əməliyyatına cavab olaraq verilib. Bu məlumatı həm iki etibarlı mənbə, həm də Misir tərəfdən şahidlər təsdiqləyib.
Qəzetin xəbərinə görə, Misirdə Səynay yarımadasına mümkün fələstinli məcburi köçkün axını ilə bağlı narahatlıqlar artır. Bunun səbəbi İsrailin Qəzza sektorunda demoqrafik vəziyyəti dəyişdirə biləcəyi ehtimalı və bunun genişmiqyaslı məcburi köçürməyə gətirib çıxara biləcəyidir.
Buna baxmayaraq, mənbələr bildirirlər ki, Misir İsraillə mövcud təhlükəsizlik razılaşmalarını və protokollarını dayandırmağı planlaşdırmır. Həmçinin hazırda Vaşinqton və ya Tel-Əviv Misiri gələcək danışıqlara aktiv şəkildə cəlb etməyə çalışmır.
Xatırladaq ki, Misir Prezidenti Əbdülfəttah əs-Sisi Doha şəhərində keçirilən ərəb-islam sammitində İsraili ilk dəfə bir neçə onillik ərzində açıq şəkildə “düşmən” adlandırıb. Bu, 1977-ci ildə Misir Prezidenti Anvar Sadatın Yerusəlimə səfəri və Knessetdə çıxışından sonra Misir rəsmi ritorikasında bu sözün istifadə edilməməsindən sonra ilk belə bəyanatdır.
