Xırdalan şəhər sakini Əli Rəşad övladı Məhəmməd Əlinin Azərbaycan Boks Federasiyası tərəfindən haqsızlığa məruz qaldığını iddia edib.
Gənc boksçunun valideyni bununla bağlı Fanat.Az-a şikayət məktubu göndərib.
O, narazılığına səbəb olan məqamları belə çatdırıb:
"Övladım Məhəmməd Əliyə qarşı olunan haqsızlığa görə sizə müraciət edirəm. Oğluma bu adı təsadüfən verməmişəm. Boks tarixində dahi əfsanənin adını daşıyır. Tək rinqdə deyil, həyatının hər addımında səbr və zəhmətlə öz yolunu qurmağa çalışan bir gəncdir. Amma övladım da adaşı kimi erkən yaşlarında böyük haqsızlıqla üzləşib.
Məhəmməd Əli 2024-cü ildən etibarən Xırdalan şəhərində yerləşən Abşeron Boks Klubunda Nazim Mehdiyevin rəhbərliyi altında boks məşqlərinə başlayıb. Övladımın naliyyətlərini sadalayaraq bildirirəm ki, 2024-cü ildə noyabr ayında ilk dəfə Rusiya Federasiyasının Moskva şəhərində keçirilən Beynəlxalq turnirdə bürünc medala layiq görülüb. 2025-ci ildə Kadetlər arasında boks üzrə zona birinciliklərinin final mərhələsinin 52 kq kateqoriyasında qalibi olandan sonra yığma komanda ilə birlikdə Rusiya Federasiyasının Ufa şəhərində keçirilən beynəlxalq turnirdə fəal iştirak edərək 1-ci yerə yiyələnib. Elə həmin ilin iyun ayında Serbiyanın Zlatibor şəhərində keçirilən Avropa Birinciliyi zamanı rus boksçu ilə yarımfinal döyüşündə edilən haqsızlığa rəğmən, övladım bürünc medal əldə edib. Başqa bir haqsızlığı isə öz həmvətənlimiz, Boks Federasiyasının İdarə Heyətinin üzvü, Kadetlərdən ibarət yığma komandanın baş məşqçisi Rövşən Hüseynov etdi. Onunla bağlı şikayətimin bir neçə əsası var. Övladımın iştirak etdiyi bütün yarışlarda nəticə verdiyinə baxmayaraq Rövşən Hüseynov öz vəzifəsindən sui-istifadə edərək 2025-ci il avqust ayının 22-24 tarixlərində saxta yoldaşlıq görüşü təşkil etdi. Bu yoldaşlıq görüşündə oğlumun növbəti dəfə qalib gəlməsinə baxmayaraq, Rövşən Hüseynov oğlumun Avropa Birinciliyinə aparılmayacağını bildirib.
Həmçinin nəzərinizə çatdırıram ki, təlim-məşq toplanışları zamanı məşqçı heyəti bir sıra özbaşınalıqlar edib, məktəbli uşaqlarla sanki əsir götürülmüş düşmən kimi rəftar edirlər. Sadaladıqlarım azmış kimi uşaqların döyülməsi və təhqir olunması faktları vardır. Konkret, Bakıda keçirilən təlim-məşq toplanışı zamanı İçərişəhərdə yerləşən oteldə guya “nizam-intizam” yaratmaq məqsədi ilə məktəbli uşaqları döyüblər. Özbəkistanda isə icazəsiz olaraq, məcburən uşaqların saçlarını keçəl qırxıblar, telefonları əllərindən alınaraq valideynləriylə danışmağa məhdudiyyət qoyublar. Azərbaycanın gələcək əsgərləri olacaq övladlarımızla belə davranış ixtiyarını bunlara kim verib?"
Boksçunun atası ədalət axtarışında olduğunu və neqativ hallarla bağlı artıq yuxarı instansiyalara müraciət etdiyini də əlavə edib: "Biz sadəcə, ədalət axtarışındayıq. Əməyimizlə, əziyyətimizlə əldə etdiyimiz haqqın bizə qaytarılmağını, bir daha bu kimi halların baş verməməyini istəyirik. Əgər hər dəfə kimsə başqasının yerinə, tanınmış şəxsin övladı və yaxud hər hansı imkanlı şəxsin uşağı olduğu üçün seçiləcəksə, biz necə övladlarımızı necə həvəsləndirək, onlara necə inam verək? Belə də ölkədən necə çempionlar çıxsın? Baş verən hadisələrin oğlumu necə sarsıtdığını görürəm və onun üçün əlimdən gələni etmək istəyirəm. Bunu hüquqi yolla əldə etmək məqsəilə yuxarı instansiyalara müraciət ünvanlamışam. Konkret, Heydər Əliyev Fondunun prezidenti Mehriban xanım Əliyevaya şikayət məktubu göndərərək xahiş etmişəm ki, haqqımızın tapdalanmasına icazə verməsin. Bizim dövlətimizdən başqa ümid yerimiz olmamalıdır. Bu tək bizə qarşı deyil, Azərbaycanın idman siyasətinə vurulmuş zərərdir. Bu kimi addımlara görə gənclərimiz idmandan uzaqlaşır, olan inamı ölür. Biz ədalətə, dövlətimizə inanırıq və edilən haqsızlığın cazasız qalmayacağından əminik".
Qarşı tərəfin ittihamla bağlı mövqeyini işıqlandırmaq üçün Boks Federasiyasına müraciət etdik. Müraciətimizi cavablandıracaqlarını söyləsələr də, 24 saat ərzində ortaya mövqe qoymadılar.
Fanat.Az
