Bakı, 22 sentyabr, AZƏRTAC
Göteborq Universitetində aparılan yeni araşdırma göstərib ki, gənclər üçün yalnız dişlərin ağ olması deyil, həm də rəngin bərabərliyi çox vacibdir.
AZƏRTAC “MedicalXpress” portalına istinadla xəbər verir ki, “Acta Odontologica Scandinavica” jurnalında dərc olunan tədqiqatda 18-30 yaş arası 2082 nəfər iştirak edib. Onların orta yaşı 25 olub və 55 faizi qadınlardan ibarət olub. Nəticələrə görə, itirakçıların 77 faizi dişlərinin rəngindən razıdır. Dişlərin bir hissəsində rəng fərqi olanlar isə daha az məmnun qalıblar. Fotoşəkillərə baxanların 90 faizi estetik problemi məhz rəng dəyişməsi ilə əlaqələndirib. Ağ dişlər orta hesabla 7,25 bal, bərabər rəng isə 8 bal ilə qiymətləndirilib.
Tədqiqatın müəllifi, stomatoloq Laura Stahl bildirib ki, gənclərin dişlərə baxışını anlamaq və onların narahatlıqlarını nəzərə almaq vacibdir: “Sağlamlıq yalnız ağız sağlamlığı deyil, həm də gülümsəyə bilmək və özünə inam hiss etməkdir”.
Araşdırmaya görə, qadınların 22 faizi, kişilərin isə 13 faizi dişlərini ağardıb. Dişlərində rəng fərqi olanların 9 faizi müalicə alıb, 52 faizi isə bu müalicəyə maraq göstərib.
Mütəxəssis Nina Sabel qeyd edib ki, dişlərin rəng korreksiyası düzgün aparılarsa, estetik görünüş yaxşılaşa bilər: “Dişlərin ağardılması hər zaman tam həll deyil. Müxtəlif rəng dəyişmələri üçün müxtəlif müalicələr tələb olunur. Ən əsası isə müalicə stomatoloq nəzarəti altında aparılmalıdır”.
Gənc yetkinlər üçün dişlərin sadəcə ağ olması deyil, rəngin bərabər görünməsi daha böyük əhəmiyyət daşıyır.
