Üçlüyün diplomatları BMT-də birgə bəyanatla çıxış edib...
Poliqon xəbər verir ki, Cənubi Koreya, ABŞ və Yaponiyanın yüksək səviyyəli diplomatları Şimali Koreyanın denuklearizasiyasına dair “qətiyyətli sadiqliklərini” təsdiqləyən birgə bəyanat yayıblar. Sənəddə Pxenyana qarşı sanksiyaların davam etdirilməsinin vacibliyi vurğulanıb.
Bəyanat BMT Baş Assambleyasının kuluarlarında keçirilən görüşdən sonra elan edilib. Görüşdə Cənubi Koreyanın xarici işlər naziri Ço Hen, Yaponiyanın xarici işlər naziri Takeşi İvaya və ABŞ dövlət katibi Marko Rubio iştirak ediblər.
Sənəddə qeyd olunub ki, “dövlət katibi və xarici işlər nazirləri BMT Təhlükəsizlik Şurasının müvafiq qətnamələrinə uyğun olaraq KXDR-in denuklearizasiyasına sadiq olduqlarını təsdiqləyiblər. Onlar Koreya yarımadasında sülh və sabitliyin qorunması üçün dialoq və diplomatiya vasitəsilə səyləri davam etdirməyə hazır olduqlarını bildiriblər”.
Qeyd edək ki, bu açıqlamadan bir gün öncə Şimali Koreya lideri Kim Çen In ABŞ prezidenti Donald Tramp administrasiyası ilə dialoqa açıq olduğunu bəyan etmişdi. Lakin Pxenyan rəhbəri Vaşinqtonun əsas tələbini – nüvə proqramının tam dayandırılmasını – qəbul etməyəcəklərini açıq şəkildə ifadə edib.
Ekspertlər hesab edirlər ki, tərəflərin mövqelərində ciddi fərqlər qalmaqda davam edir və bu, danışıqların perspektivini sual altına alır. Bununla belə, Vaşinqton, Seul və Tokio Pxenyanla diplomatik kanalları açıq saxlayaraq, eyni zamanda təzyiq alətlərini gücləndirməyi prioritet hesab edirlər.
Poliqon.info
