Son onilliklərin ən güclü daşqınları Pakistanın kənd və şəhər ərazilərini vurub, ölkəyə milyardlarla dollar ziyan dəyib və ərzaq təchizatı ciddi şəkildə təhlükə altına düşüb.
News365.az xəbər verir ki, hökumət əvvəlcə Beynəlxalq Valyuta Fondunun 7 milyard dollarlıq yardımı sayəsində iqtisadi sabitliyin bərpasını və kənd təsərrüfatı ilə emal sənayesinin canlanmasını planlaşdırırdı. Bu çərçivədə 2026-cı il üçün 4,2% iqtisadi artım proqnozlaşdırılmışdı.
Lakin iyun ayının sonundan Hindistandakı bəndlərdən sızan su ilə daha da güclənən rekord musson yağışları Pəncab və Sind əyalətlərinin geniş sahələrini su altında qoyub. Bir çox bölgələrdə hələ sular çəkilməyib. Analitiklər və yerli səlahiyyətlilər hesab edirlər ki, hazırkı vəziyyət 2022-ci ildə baş verən daşqınlardan daha ağırdır və ölkə ərazisinin üçdə biri sular altında qala bilər.
GEOGLAM kənd təsərrüfatı monitorinq təşkilatının hesabatına görə, avqustun 1-dən sentyabrın 16-dək 220 min hektardan çox çəltik sahəsi su altında qalıb. Pəncabda çəltik, pambıq və qarğıdalı sahələrinin böyük hissəsi – təxminən 1,8 milyon hektar – daşqınlardan zərər görüb. Pakistan Fermerlər Assosiasiyasının sədri Xalid Bat bildirib ki, çəltik sahələrinin 50%-i, pambıq və qarğıdalı məhsulunun 60%-i ciddi ziyan çəkib.
Hesablamalara görə, ölkədə məhsulun ən azı 10%-i məhv olub, bəzi bölgələrdə tərəvəz istehsalında itki 90%-ə çatıb. Pakistanın planlaşdırma naziri Əhsan İqbal ziyanların ÜDM-ə mənfi təsir göstərəcəyini etiraf edib və dəqiq məlumatların gələcək iki həftə ərzində açıqlanacağını bildirib.
News365.az
