Əsədin devrilməsindən sonra Suriyada humanitar böhran davam edir...
Poliqon xəbər verir ki, Suriyada Bəşər Əsəd rejiminin süqutundan sonra ölkəyə təxminən bir milyon qaçqın geri dönüb. Bu barədə The Washington Post BMT-nin Qaçqınlar üzrə Ali Komissarlığına (UNHCR) istinadən məlumat yayıb.
Rəsmi məlumatlara görə, dekabr ayından bəri 419 min nəfər Türkiyədən, 334 min nəfər Livandan, 204 min nəfər İordaniyadan, 37 min nəfər İraqdan və 27 min nəfər Misirdən Suriyaya qayıdıb. Geri dönənlərin təxminən 350 min nəfəri Dəməşq və Hələbdə məskunlaşıb. Əlavə olaraq, 95 min nəfərin Dəraa şəhərinə qayıtdığı bildirilir.
Suriyada on ildən artıq davam edən vətəndaş müharibəsi nəticəsində ümumilikdə 13 milyon suriyalı doğma yurdlarını tərk etmək məcburiyyətində qalıb. Bu isə təkcə region ölkələrində deyil, Avropada da dərin humanitar böhran yaradıb.
Hazırda hüquq müdafiəçilərinin məlumatına əsasən, ölkə əhalisinin 90 faizə qədəri, yəni 16,7 milyon nəfərə yaxın insan — təcili humanitar yardıma ehtiyac duyur. Beynəlxalq təşkilatlar Suriyanın sabitliyə qayıtmasına baxmayaraq, müharibənin sosial və iqtisadi fəsadlarının uzun illər davam edəcəyini istisna etmir.
Poliqon.info
