Ukrayna hökuməti əhalinin elektrik enerjisi xərclərini qarşılamaq üçün maliyyə dəstəyi proqramı təsdiqləyib. Oktyabr ayından etibarən bəzi ailələrə aylıq 300 kilovat-saata qədər elektrik enerjisi üçün kompensasiya veriləcək. Vətəninfo.az xəbər verir ki, bu barədə Ukraynanın Sosial Siyasət Nazirliyi məlumat yayıb.
Proqram əsasən fəal döyüş əməliyyatları gedən və ya təhlükə altında olan bölgələrdə yaşayan insanlara şamil olunacaq. Qərara əsasən, artıq imtiyaz və ya subsidiya alan və təhlükəli ərazilərdə faktiki yaşayan ailələr kompensasiyaya avtomatik olaraq hüquq qazanacaqlar.
Nazirliyin məlumatına görə, bu təşəbbüs evakuasiya olunmamış və öz evlərində qalan vətəndaşları dəstəkləməyə yönəlib. Proqramın əsas məqsədi isə ev təsərrüfatlarının minimal elektrik enerjisi ehtiyaclarını qarşılamaq və ehtiyat enerji mənbələrindən istifadəyə şərait yaratmaqdır.
Kompensasiya necə hesablanacaq?
Aylıq ödəniş ailə üzvlərinin sayına əsasən müəyyən ediləcək:
Hər bir nəfərə 100 kVt/saat üçün kompensasiya veriləcək.
Bu isə 432 Ukrayna qrivnası (təxminən 19,60 AZN) təşkil edir.
Ailənin ümumi kompensasiyası isə 300 kVt/saatdan çox ola bilməz – yəni maksimum 1296 qrivna (təxminən 58,70 AZN).
Əlavə müraciətə ehtiyac yoxdur
Vətəndaşların əlaqədar sosial orqanlara müraciət etməsinə ehtiyac qalmayacaq – kompensasiyalar Pensiya Fondu tərəfindən avtomatik olaraq, mövcud imtiyaz və ya subsidiyalarla birlikdə ödəmə sənədlərinə əlavə ediləcək.
Qaydalar və məhdudiyyətlər
Sosial Siyasət Nazirliyi qeyd edir ki, bu yardım məqsədli və müvəqqəti xarakter daşıyır. Proqram yalnız mövcud limit daxilində istifadəni əhatə edir – limitdən artıq sərfiyyat vətəndaşlar tərəfindən öz vəsaiti ilə ödəniləcək.
Kompensasiya aşağıdakı hallarda dayandırılacaq:
Ailə imtiyaz və ya subsidiya hüququnu itirirsə
Yaşadığı ev dağıdılaraq yararsız hala düşərsə
Ailə təhlükəli ərazidən köçərsə və ya ölkəni tərk edərsə
