Ukraynanın müttəfiqlərinin Rusiya ilə mübarizədə hələ istifadə etmədikləri güclü bir vasitələri var. The Telegraph yazır ki, bu, Ukraynaya maliyyə dəstəyi məqsədilə istifadə oluna biləcək dondurulmuş Rusiya aktivləridir — təxminən 230 milyard avro dəyərində.
Dron və raket hücumları fonunda qərarsızlıq
Sentyabrın 28-nə keçən gecə Rusiya növbəti dəfə Ukrayna şəhərlərini yüzlərlə dron və raketlə hədəfə alıb. Bu hücumlar artıq adi hala çevrilib və ABŞ prezidenti Donald Trampın avqust ayında Alyaskada Vladimir Putinlə görüşündən sonra intensivləşib.
The Telegraph qeyd edir ki, Putin təkcə Ukraynanın müqavimətini deyil, eyni zamanda NATO-nun, Avropanın və ABŞ-ın qərarlılığını da sınağa çəkir. Tramp Putinlə münasibətləri yumşaltmaq üçün ona boş vədlər və təriflərlə yaxınlaşsa da, ardınca Rusiyaya yardım edən dövlətlərə, o cümlədən Moskvanın ucuz neftini alan Hindistana qarşı sanksiyaları sərtləşdirib.
Lakin son olaraq BMT Baş Assambleyasında çıxış edən Tramp vəziyyətin “çox çətin olduğunu” bildirərək məsuliyyətdən yayınmağa çalışıb və Ukraynaya sadəcə “uğurlar” arzulamaqla kifayətlənib.
Ukrayna üçün istifadə olunmayan “maliyyə silahı”
The Telegraph yazır ki, Qərbin əlində həlledici maliyyə silahı var: dondurulmuş Rusiya aktivləri. Bu aktivlər ya birbaşa Ukraynanın hərbi ehtiyacları üçün istifadə oluna, ya da silah alınması üçün kredit təminatı kimi istifadə edilə bilərdi.
Yalnız son vaxtlar Almaniyanın kansleri Fridrix Merts bu məsələ ilə bağlı mövqeyini dəyişərək AB rəsmilərini bu aktivlərin Ukraynanın xeyrinə istifadə olunmasına çağırıb. Onun sözlərinə görə, bu, 140 milyard avro dəyərində kreditin açılmasına imkan verə və Qərbin Rusiyanın aqressiyasına qarşı “səbatlı mövqeyini” nümayiş etdirə bilərdi.
“Bu, zəiflik deyil, ümidsizliyin göstəricisidir”
Britaniya mediası yazır ki, gecələr Ukrayna şəhərlərinə edilən raket hücumları Rusiyanın gücündən yox, ümidsizliyindən xəbər verir. Ukrayna isə artıq uğurla Rusiya neft emalı zavodlarına zərbələr endirir.
“Ukraynaya indi maliyyə dəstəyi lazımdır. Bu, həlledici faktor ola bilər”, – deyə The Telegraph vurğulayır.
Mümkün planlar: Britaniya və AB-nin mövqeyi
Bundan əvvəl Almaniya kansleri Merts, Financial Times üçün yazdığı məqalədə Avropa İttifaqını bu vəsaitlərin hüquqi yolla istifadəsi üçün mexanizm hazırlamağa çağırmışdı. O bildirib ki, Rusiya aqressiyasının qiyməti sistemli və kəskin şəkildə artırılmalıdır.
Eyni zamanda, Böyük Britaniya da bu məsələ ilə bağlı konkret addım atmağa hazırlaşır. Maliyyə naziri Reyçel Rivz dondurulmuş Rusiya aktivlərinin Ukrayna üçün istifadəsini nəzərdə tutan yeni plan təqdim edib.
