ABŞ vitse-prezidenti siyasi böhranın dərinləşdiyini bildirib…
Poliqon xəbər verir ki, ABŞ vitse-prezidenti Cey Di Vens hökumətin fəaliyyətinin dayandırılacağına inanır. O, CNN-ə açıqlamasında bildirib ki, hazırda dövlətin maliyyələşmə mexanizmləri ilə bağlı ciddi çıxılmaz vəziyyət yaranıb və kompromis əldə olunmaması hökumətin fəaliyyətini iflic edə bilər.
“Düşünürəm ki, hökumətin fəaliyyəti demokratlar ucbatından dayanacaq. Ümid edirəm, onlar fikirlərini dəyişərlər, amma gözləyib görəcəyik”, – deyə Vens vurğulayıb.
Onun sözlərinə görə, demokratlar hökumətin işləməsini təmin etmək üçün səhiyyə sahəsinə əlavə maliyyələşmənin şərt qoyulmasında israr edirlər. Vens isə bunun dövlət idarəçiliyində böhran yaratdığını və qısamüddətli maliyyələşmə razılaşmasının qarşısını aldığını bildirib.
ABŞ-da hökumətin maliyyələşməsinin dayanması (shutdown) minlərlə dövlət qulluqçusunun məzuniyyətə göndərilməsi, federal xidmətlərin və proqramların fəaliyyətində ciddi fasilələrin yaranması ilə nəticələnə bilər. Ekspertlər bu vəziyyətin həm iqtisadiyyata, həm də ABŞ-ın beynəlxalq nüfuzuna mənfi təsir göstərəcəyini qeyd edirlər.
Poliqon.info
