Ehtiyatda olan bəzi Danimarka əsgərləri məxfi çağırışa əsasən, təcili olaraq Danimarkada xidmətə çağırılıblar...
Poliqon xəbər verir ki, bu barədə TV 2 kanalı məlumat yayıb.
Çağırış Danimarka hava məkanında dronlarla bağlı vəziyyətə birbaşa istinad etməklə həyata keçirilir. Sənəddə deyilir ki, əsgərlər mümkün qədər tez xidmətə getməlidirlər. Ancaq çağırışın dəqiq miqyası məlum deyil. Mənbələrə görə, söhbət bir neçə yüz hərbçidən gedir.
"Miqyasından asılı olmayaraq, belə təcili çağırışlar son dərəcə qeyri-adidir", deyə jurnalistlər qeyd edirlər.
Təhlükəsizlik müşaviri və Hərbi Kəşfiyyat Xidmətinin keçmiş baş analitiki Yakob Kaarsbo bildirib: "Bu, bizim tamamilə müstəsna vəziyyətdə olduğumuzu göstərir. Ona görə də belə müstəsna tədbirlər görülür. Daha əvvəl belə bir şey eşitdiyimi xatırlamıram".
TV 2 telekanalının məlumatına görə, çağırış ölkə ərazisində mümkün qoşun yeridilməsinə hazırlıqla bağlıdır. Təhlükəsizlik müşavirinin sözlərinə görə, bu, tezliklə Kopenhagendə keçiriləcək Aİ sammiti ərəfəsində kifayət qədər məntiqlidir.
"İstənilən halda, baş verən hadisələri nəzərə alaraq yüksək hazırlıq vəziyyətindəyik. Və Rusiya gəmiləri ölkəmizin ətrafında üzməkdə davam edir. Əminəm ki, bütün resurslardan istifadə olunacaq", deyə Yakob Kaarsbo bildirib.
Danimarka ordusunun sərəncamında olan ehtiyatda olan əsgərlərin sayı ilə bağlı dəqiq rəsmi rəqəmlər yoxdur, lakin 2013-cü ildə Danimarka Ehtiyat Personal Qərargahı onların sayının təxminən 3000 əsgər olduğunu təxmin edib.
Poliqon.info
