“Karvan-Yevlax” 3 oyundur davam edən məğlubiyyət seriyasına son qoydu.
Həm də necə?
Çempionluğa iddialı “Neftçi”ylə səfər qarşılaşmasında qolsuz bərabərə qalıb 1 xal qoparmaqla.
Görüş başa çatandan sonra Yevlax təmsilçisinin düşərgəsində bayram ab-havası hiss olunması anlaşılan idi.
Oyunun ən yaxşılarından olan nigeriyalı yarımmüdafiəçi Gavi Tompson Sportinfo.az-a verdiyi müsahibədə sualları cavablandırıb.
- Oyunu və nəticəni necə dəyərləndirirsən?
- Son matçlarda qələbə qazana bilməməyimiz müəyyən gərginlik yaratmışdı. Artıq itiriləcək heç nəyimiz qalmamışdı. Sözü bir yerə qoyduq ki, nəyin bahasına olursa-olsun uduzmamalıyıq. Meydanca canımızı qoyaraq haqq etdiyimiz 1 xalı qazandıq. Pis nəticə deyil.
- Pis deyil, yoxsa qələbəyə bərabər heç-heçədir?
- Qələbənin öz yeri var, heç-heçənin öz yeri. Bu gün 3 yox, 1 xal qazandıq.
- Oyunun sonlarına yaxın əks-hücumlarda fərqlənmək imkanınız olsa da, sanki böyük qüvvə ilə irəli atılmaqdan çəkinirdiniz. 0:0-ın ürəyinizcə olması kənardan aşkar hiss olunurdu.
- “Neftçi” kimi rəqiblə zarafat etmək olmaz. Bacardığımız qədər nəsə etməyə çalışırdıq. Lakin belə məqamda 5-6 nəfərlə hücuma atılmaq risk olardı. Məqsədimiz ardıcıl 3 yenilgidən sonra məğlub olmamaq, imkan yaranacağı təqdirdə qol vurmaq idi.
- “Neftçi” niyə qələbə qazana bilmədi?
- Çünki biz əsl döyüşçülər kimi döyüşdük, uduzmamaq üçün meydanda ürəyimizi qoyduq. Mübarizlik göstərəndə hədiyyəsiz qalmırsan.
- “Karvan-Yevlax”ın cari mövsümdə ən yaxşı oyununu keçirməsi fikri ilə razısan?
- Kollektiv şəkildə apardığımız mübarizəni nəzərdə tutursunuzsa, bəli, tam razıyam. Ancaq oyunun gözəlliyindən danışırıqsa, “Kəpəz”ə 3 qol vurduğumuz matçı fərqləndirərdim.
- Heyətdəki dəyişikliklərin komandaya köməyi dəydi?
- Əlbəttə. Sevindirici hal odur ki, heç kim ehtiyatda qalmağa görə etiraz etmir. Üstəlik, keçən görüşdə meydana çıxmayanlar şans qazandığı təqdirdə əlindən gələni edir. Bu, kollektivçilikdən xəbər verir.
- “Palms Sports Arena”daki ab-hava barədə nə deyə bilərsən?
- Bu stadionu çox sevdim. Xüsusən meydanın ideal vəziyyətdə olması əlavə motivasiya verirdi. Belə qazonda oynamaq həqiqətən xoşdur. Çünki istədiyini və düşündüyünü edə bilirsən. Azarkeşlərin yaratdığı atmosfer də matça əlavə rəng qatdı.
HƏBİB
