Ajans.az xəbər verir ki,qəza çərşənbə axşamı İbaji bölgəsində qeydə alınıb. Kogi əyalətinin informasiya üzrə komissarı Kingsley Fanwonun sözlərinə görə, qayıqda olan sərnişinlərin əksəriyyəti qonşu Edo əyalətində yerləşən bazara gedən yerli ticarətçilər olub. “Bu, çox ağrılı itkidir. Bu kədərli vaxtda düşüncələrimiz və dualarımız mərhumların ailələri və bütün İbaji icması ilə birlikdədir,” – deyə Fanwo bildirib. Qəzanın dəqiq səbəbi hələlik müəyyən edilməyib. Lakin yerli hökumət nümayəndəsi qeyd edib ki, Kogi əyaləti hökuməti bu kimi hadisələrin qarşısını almaq üçün federal su nəqliyyatı qurumları ilə əməkdaşlıq edəcək, o cümlədən su yollarında təhlükəsizlik tədbirlərinin gücləndirilməsi planlaşdırılır. Afrikanın ən çox əhali yaşayan ölkəsi olan Nigeriyada, xüsusilə ucqar bölgələrdə, yağışlı mövsüm zamanı belə qəzalara tez-tez rast gəlinir. Analitiklərin fikrincə, bunun əsas səbəbləri arasında:
Qayıqların həddindən artıq yüklənməsi,
Xilasedici jiletlərin olmaması,
Texniki nasazlıq və lazımi texniki baxışın keçirilməməsi göstərilir.
Yalnız ötən ay Niger əyalətinin Borqu bölgəsində baş vermiş başqa bir bənzər hadisə nəticəsində ən azı 31 nəfər həyatını itirmişdi. Həmin qayıq həddindən artıq yüklü olduğu halda hərəkət edərkən ağac gövdəsinə çırpılmışdı. Hazırda hadisə ilə bağlı araşdırmalar davam edir.
