Britaniya hakimiyyəti Çin ilə yaxşı ticarət və diplomatik münasibətlər saxlamaq üçün Çinin xeyrinə casusluqda şübhəli bilinənləri mühakimə etməkdən imtina edib...
Poliqon xəbər verir ki, bu barədə Financial Times (FT) ölkə hökumətindəki mənbələrə istinadən məlumat yayıb.
Nəşr qeyd edir ki, sentyabrın 15-də Kral Prokurorluğu iki britaniyalıya qarşı "Rəsmi sirlər haqqında" qanunu pozmaqda və məxfi məlumatları toplayaraq Çin tərəfinə ötürməkdə ittihamı ləğv edib.
Keçən ilin aprelində açılan işdə Kristofer Berri və Kristofer Keşin Böyük Britaniyanın təhlükəsizliyi və təhlükəsizlik maraqları naminə 28 dekabr 2021-ci il və 3 fevral 2023-cü il tarixləri arasında 1911-ci il Rəsmi Sirrlər Aktını pozaraq "düşmən üçün faydalı" sənədlər və ya məlumatların alınması, toplanması, qeydə alınması, dərc edilməsi və Çinə ötürülməsi iddiaları yer alırdı.
FT mənbələri məhkəməyə bildiriblər ki, Böyük Britaniya Baş nazirinin milli təhlükəsizlik üzrə müşavir müavini Metyu Kollinz məhkəmədə Çini düşmən adlandırmaqdan imtina etdikdən sonra iş bağlanıb.
Nəşr qeyd edib ki, bu addımla münaqişəli vəziyyətdən qaçmağa və Pekinlə yaxşı münasibətləri saxlamağa çalışan Britaniya hökumətinin xarici siyasət blokunun təkidi ilə ittihamlar götürülüb.
Həbs olunduğu zaman Keş Britaniya parlamentində katib işləyib. Adətən, belə bir vəzifədə olan işçinin vəzifələrinə deputatların müxtəlif məsələlərə baxışlarını formalaşdıran məlumatların toplanması daxildir.
Britaniya mediasının məlumatına görə, saxlanılan şəxs o vaxtkı hakim Mühafizəkarlar Partiyasının bir neçə parlamentarisi, o cümlədən məxfi məlumatlara çıxışı olanlarla sıx əlaqədə olub. Onların arasında o vaxtkı daxili işlər nazirinin müavini Tom Tugendhat və parlamentin xarici əlaqələr komitəsinin sədri Alisiya Keyns də var.
Poliqon.info
