Avstriyalı çalışdırıcı Adi Hyütter “Monako” klubundan baş məşqçi vəzifəsindən ayrılması ilə bağlı fikirlərini bölüşüb.
90deqiqe.Az xəbər verir ki, "L’Équipe" təcrübəli mütəxəssisin fikirlərini belə çatdırıb:
“Son iki ildə əldə etdiyimiz uğurları və demək olar ki, yalnız müsbət məqamları xatırlayacağam. Biz ‘Monako’nu Fransa çempionatında liderlər üçlüyünə qaytardıq və uzun fasilədən sonra ardıcıl iki mövsüm UEFA Çempionlar Liqasında iştirak etdik. Bəzən yollar ayrılır, amma mən bunu yaxşı qəbul edirəm. Arxamda keyfiyyətli, yaxşı işləyən və əla futbolçulardan ibarət bir komanda qoyuram. Rəhbərliyə, oyunçulara, heyətə və klubun bütün üzvlərinə gələcəkdə uğurlar arzulayıram.”
Avstriyalı mütəxəssis klubda iki mövsüm çalışaraq iki dəfə UEFA Çempionlar Liqasına vəsiqə qazanıb. Hazırda “Monako” Liqa 1-də 5-ci yerdə qərarlaşıb və mövcud çempion PSJ-dən 3 xal geri qalır.
