İtaliya Xarici İşlər Nazirliyi, Rusiyanın Romadakı səfiri Aleksey Paramonovu nazirliyə çağırdı. Rusiya Xarici İşlər Nazirliyinin sözçüsü Mariya Zaxarovanın İtaliya iqtisadiyyatının Ukraynaya dəstəyi səbəbindən "Torre dei Conti" qülləsi kimi çökəcəyini deməsindən sonra nazirliyə çağırıldı.
İtaliyanın mərkəzində, Romada bu günortadan sonra iki dəfə çökən Torre dei Conti qülləsi, münasibətləri bəzən gərginləşən İtaliya ilə Rusiya arasında diplomatik gərginliyi yenidən alovlandırdı.

Romadakı orta əsr qülləsinin bir hissəsi bərpa zamanı çökdü.

Milli medianın məlumatına görə, Rusiya sözçüsü Zaxarova Telegram hesabındakı paylaşımda bu gün Romada qismən çökən qüllə və İtaliyanın Ukraynaya yardımından bəhs edərək dedi: "İtaliya hökuməti vergi ödəyicilərinin pullarını israf etdiyi müddətcə, İtaliya iqtisadiyyatdan tutmuş qüllələrə qədər çökməyə davam edəcək".

Zaxarovanın şərhləri İtaliyada qəzəbə səbəb oldu.

İtaliyanın ANSA xəbər agentliyinin məlumatına görə, İtaliya Xarici İşlər Nazirliyi Zaxarovanın sözlərinə cavab olaraq Rusiyanın Romadakı səfiri Aleksey Paramonovu nazirliyə çağırıb.

Məlumatda bildirilir ki, İtaliya Xarici İşlər Nazirliyinin mənbələri Zaxarovanın sözlərini "pis, kobud və həyəcan verici" adlandırıblar.

Baş nazirin müavini və Nəqliyyat və İnfrastruktur naziri, Rusiya ilə sıx əlaqələri həmişə ictimaiyyətin diqqət mərkəzində olan ifrat sağçı Liqa Partiyasının lideri Matteo Salvini televiziya proqramında Zaxarovanın sözlərini belə şərh edib:

"Dağıntılar altında hələ də bir işçi, yaralılar olduğu halda, xilasetmə qrupları ilə birlikdə olmalı, sükutumuzu və hörmətimizi qorumalıyıq. (ABŞ Prezidenti Donald) Trampın təklif etdiyi kimi, Rusiya ilə Ukrayna arasındakı müharibəyə son qoymaq mütləq prioritetdir və biz 50 il ərzində Ukraynaya pul göndərə bilmərik."

Bu arada, İtaliyanın müdafiə naziri Guido Crosetto Ukrayna üçün yeni hərbi yardım paketi hazırladıqlarını bildirib və deyib: "Ukrayna ilə bağlı mövqeyimiz dəyişməz olaraq qalır."

Romanın mərkəzindəki turistik Fori Imperiali Bulvarına baxan 13-cü əsrə aid Torre dei Conti qülləsində bərpa işləri zamanı yerli vaxtla təxminən saat 11:30 və 13:00 radələrində iki çökmə baş verib.

Qismən çökən qüllədən bir işçi ağır xəsarətlərlə xəstəxanaya aparılıb. İkinci çökmənin dağıntıları altında qalan digər bir işçinin xilas edilməsi üçün səylər davam edir.

aia.az
Tərcümə şöbəsi

• Rusiya
• Səfir
• Nazirlik
• İtaliya