İrlandiya hökuməti rəsmi olaraq Gürcüstan vətəndaşlarının deportasiyasına başlayıb.
NOCOMMENT.az xəbər verir ki, yerli polis idarəsinin — An Garda Síochána — məlumatına görə, çarter reysi ilə ölkədən 52 nəfər gürcü miqrant, o cümlədən 35 kişi, 10 qadın və 7 uşaq çıxarılıb.
Reys Dublin hava limanından İrlandiyanın Daxili İşlər Nazirliyinin koordinasiyası ilə həyata keçirilib. Rəsmi məlumata əsasən, deportasiya edilən şəxslərin sığınacaqla bağlı müraciətləri rədd edilib və bütün hüquqi prosedurlar başa çatdıqdan sonra qərar icraya yönəldilib.
İrlandiyanın daxili işlər naziri Cim O’Kallahan bildirib ki, əməliyyat Avropa İttifaqının miqrasiya qaydalarına uyğun şəkildə aparılıb:
“Bu tədbirin məqsədi sistemin qanuniliyini qorumaq və miqrasiya balansını bərpa etmək idi.”
Nazirin sözlərinə görə, İrlandiya Gürcüstan hökuməti ilə miqrasiya məsələlərində əməkdaşlığı davam etdirir və qanuni miqrasiya kanallarının gücləndirilməsinə dəstək verməyə hazırdır.
İrlandiya mediasının məlumatına görə, deportasiya əməliyyatı dövlətə təxminən 187 min avroya başa gəlib. Miqrantların ölkədən çıxarılması bir neçə həftə davam edən məhkəmə prosesindən sonra, deportasiya qərarlarının hüquqi qüvvəyə minməsi ilə icra olunub. (InterPress.ge)
