“Tesla” şirkətinin səhmdarları baş direktor İlon Mask üçün nəzərdə tutulan ödəniş paketini təsdiqləyiblər. Bu qərar onu dünyanın ilk trilyoneri edə bilər. CNN telekanalının məlumatına görə, illik səhmdarlar yığıncağında iştirak edənlərin 75%-dən çoxu təklif olunan mükafatlandırma proqramının lehinə səs verib.
Fiks maaş almayan Mask qarşıdakı 10 il ərzində müəyyən şərtlər yerinə yetirildiyi halda əlavə 423,7 milyon ədəd şirkət səhmini əldə etmək hüququna sahib olacaq. Əgər “Tesla” şirkətinin bazar kapitallaşması 8,5 trilyon dollar həddinə çatarsa, bu paket ümumilikdə 1 trilyon dollar dəyərində qiymətləndirilə bilər. Bunun üçün şirkət bir sıra əməliyyat və maliyyə göstəricilərinə nail olmalıdır.
Hədəf kapitallaşmaya çatmaq üçün “Tesla” səhmlərinin hazırkı qiymətindən 466% artması tələb olunur. “Bloomberg” milyarderlər reytinqinə əsasən, Mask artıq dünyanın ən varlı insanıdır — onun sərvəti təxminən 473 milyard dollar təşkil edir. Daha əvvəl Direktorlar Şurası xəbərdarlıq etmişdi ki, ödəniş paketi təsdiqlənməsə, Mask CEO vəzifəsindən getməyi nəzərdən keçirə bilər.
Yığıncaqda Mask robototexnika və süni intellektin inkişaf perspektivlərinə xüsusi diqqət ayıraraq bildirib ki, insanabənzər robotlar tarixdə “ən böyük məhsul” olacaq. Bununla belə, bu texnologiyalar hələ inkişaf mərhələsindədir və şirkət cari ildə satışların və mənfəətin azalması ilə üzləşib. Mask vurğulayıb ki, o, şirkət üzərində daha çox nəzarətə sahib olmaq üçün əlavə səhmlərə ehtiyac duyur — daha da varlanmaq istədiyinə görə yox.
