BAKI, 8 noyabr. TELEQRAF
“Çin, Mərkəzi Asiya ölkələri, Azərbaycan və Gürcüstan iqtisadi əlaqələr və ticarət tərəfdaşlığı üçün çox maraqlı bir marşrut yaradır”.
Teleqraf xəbər verir ki, bunu Gürcüstan Baş naziri İrakli Kobaxidze deyib.
“Bir kəmər, bir yol” təşəbbüsündə güclü rol oynamaq üçün hər şeyi edirik. Gürcüstanın strateji mövqeyi var. Tarixi baxımdan, Gürcüstan Qərb və Şərqi, Avropa və Asiyanı birləşdirən körpü olub və bu kontekstdə öz rolumuzu gücləndirmək istəyirik. Bu baxımdan, “Bir kəmər, bir yol” təşəbbüsündə iştirakımız bizim üçün çox perspektivlidir. Səylə tranzit funksiyamızı bərpa etmək istəyirik və bunun üçün böyük investisiyalar qoyuruq, xüsusən infrastruktur sahəsində. Gürcüstanın infrastrukturunu gücləndiririk: magistral yollar, dəniz limanları, aeroportlar və dəmir yolunun inkişafına böyük sərmayələr qoyuruq ki, Gürcüstan dünyanın müxtəlif regionları ilə əlaqələndirmə baxımından daha güclü oyunçu olsun”, - o qeyd edib.
İrakli Kobaxidze vurğulayıb ki, Orta Dəhliz təşəbbüsü ölkələr arasında iqtisadi tərəfdaşlıq və ticarət əlaqələrinin inkişafında çox vacib rol oynaya bilər:
“Çin, Mərkəzi Asiya ölkələri, Azərbaycan və Gürcüstan iqtisadi əlaqələr və ticarət tərəfdaşlığı üçün çox maraqlı bir marşrut yaradır. Bu səbəbdən Orta Dəhliz və ya Transxəzər dəhlizinin gücləndirilməsi ideyasına sadiq qalırıq”.
