BAKI, 25 noyabr. TELEQRAF
Samux rayonunda toyda dava salan şəxs həbs edilib.
Teleqraf-ın əldə etdiyi xəbərə görə, hadisə “Qoşqa” şadlıq sarayında baş verib.
2001-ci il təvəllüdlü Samux rayon sakini Əli Babayev (ad-soyad şərti verilib – red.) toy məclisində spiritli içki qəbul edib.
Daha sonra şadlıq sarayının qarşısına çıxan şəxs orada ucadan nalayiq ifadələr işlədib. Bu zaman ərazidə xidmət aparan polis əməkdaşları onu intizamlı olmağa dəvət ediblər.
Lakin o, buna əməl etməyib. Həmin zaman sərxoş vəziyyətdə polis əməkdaşlarına müqavimət göstərib.
O, əməlində peşman olduğunu, sərxoş vəziyyətdə olduğu üçün bu hərəkəti törətdiyini deyib.
Onun barəsində İnzibati Xətalar Məcəlləsinin 510 (xırda xuliqanlıq) və 535.1-ci (polisə tabe olmama) maddələri ilə ittiham elan edilib.
Samux Rayon Məhkəməsinin qərarı ilə o, 8 gün müddətində inzibati qaydada həbs edilib.
Qeyd edək ki, təqsirli bilinən şəxs vətən müharibəsi iştirakçısıdır.
