BAKI, 27 noyabr. TELEQRAF
“Bütün dəhliz boyunca vahid rəqəmsal xidmətlər ekosistemi yaratmaq çox vacibdir, bu, gecikmələri azaldacaq”.
Teleqraf xəbər verir ki, bunu Gürcüstanın iqtisadiyyat və davamlı inkişaf naziri Mariam Kvrivişvili Daşkənddə keçirilən Transxəzər Forumunda deyib.
Transxəzər dəhlizinin inkişafının mühüm faktorları kimi gürcü nazir qurumlararası koordinasiyanın gücləndirilməsi, məlumatların tam şəffaflığı və sinxronlaşdırılmış əməliyyat planlamasının təşviq edilməsini qeyd edib. Bu, tərəfdaşların tələbi proqnozlaşdırmasına, keçid qabiliyyətinin idarə olunmasına və mümkün pozuntulara birgə reaksiya verməsinə imkan yaradacaq.
“Bu addımlar birgə olaraq Transxəzər nəqliyyat marşrutunu inteqrasiya olunmuş, səmərəli və davamlı bir dəhlizə çevirməyə imkan verəcək”, - Mariam Kvrivişvili bildirib.
Nazir əlavə edib ki, Gürcüstan tranzit prosedurlarını sadələşdirmək və sürətləndirmək üçün təşəbbüslərin həyata keçirilməsini davam etdirir:
“Bunlara elektron məlumat mübadiləsi, gömrük proseslərinin avtomatlaşdırılması və regional və Avropa rəqəmsal sistemləri ilə daha sıx inteqrasiya daxildir”.
